Loluwari Média (Díli) – Diretór Diresaun Investigasaun Kriminál Nasionál (DIKN), Superintendente Polísia, João Belo dos Reis, informa, Autoridade Aduanera identifika Kontentor ho sasan Ilegal tama iha portu Tibar.
Tanba ne’e Autoridade Aduanera liga imediata ba Polísia Nasionál Timor-Leste (PNTL) liuhusi DIKN halo kedas intervensaun ba sasan Ilegal iha (8/8), Autoridade Aduanera no DIKN halo operasaun ba kontentor ne’ebé tama iha portu Tibar no Autoridade Aduanera detekta Kontentor ne’e sasan Ilegal ho sigaru Marlboro karton hamutuk 912.
“Iha sexta lokraik Diresaun Investigasaun Kriminál Nasionál asegura kedas kontentor ne’e mai iha Komandu Jerál PNTL, no ami identifika iha kontentor laran sigaru Marlboro hamutuk karton 912 mak iha kontentor laran.” Dehan Diretór DIKN, Superintendente Polísia, João Belo dos Reis, ba jornalista sira, iha komandu Jerál PNTL Kaikoli, Dili, segunda (11/08).
João Belo esplika, informasaun inisiu kontentor ne’e hatama sasan hahan fehuk ropa sona maibé hafoin Autoridade Aduanera Detekta kontentor la’os tula fehuk ropa maibé Sigaru Marlboro Karton 912 mak iha kontentor laran.
“Tanba ne’e Diresaun Investigasaun Kriminál Nasionál foti kedas medida no halo Investigasaun, no ami tau ona numeru nuk 0255/2025 PNSIK no evidensia sira ne’e ami sei submete ba Ministériu Públiku (MP).”
“Evidensia sira ne’e sei iha DIKN no auto notisia sei aprezenta ba MP, tanba na’in ba sasan Autoridade Seguransa identifika ona suspeitu ho inisial AC ne’ebé DIKN halo intervensaun ba nia.
“Ami konsidera autór nu’udar fasilitador ba sasan Ilegal ne’e ami sei entrega ba MP tanba fasilitador ne’e sidadaun Timor oan. Tanba ne’e ami nafatin koordena ho autoridade aduanera, bainhira saida de’it mak tama iha portu entrada mak fora husi sasan ne’ebé legal mak sira informa mai ami, ami sei foti medida imediata.”
PNTL husu sidadaun hotu atu kumpri lei sira ne’ebé iha atu nune’e labele difikulta imi nia negosiu.
Jornalista : Chay Risky