Loluwari Média (Ainaro) – Sekretáriu Estadu Kooperativa konsidera joven mak futuru nasaun, tanba nia sujere joven sira kontinua habelar kretividade atu hasa’e diversidade ekonomia iha Timor-Leste.
Sekretáriu Estadu Kooperativa (SEKOOP), Arsenio Pereira, sente kontente tebes mai partisipa iha eventu ida ne’ebé mak organizasaun husi Alumi Parlamentu Foinsa’e no mós parseiru tanba ne’e enkoraja joven sira kontinua hatudu kreatividade nune’e bele hasa’e diversidade ekonomia iha Timor-Leste.
“Ha’u kontente, tanba ita bo’ot sira maka sai futuru ba nasaun ida ne’e, ita bo’ot sira maka sei kontinua, nune’e ha’u hakarak mai partilla ho foinsa’e sira liuliu organiza husi parseiru sira, atu ita bele halo buat ruma liuhusi ita nia kreatividade,” dehan Sekretáriu Estadu Kooperativa (Sekoop), Arsenio Pereira, iha Rabilau, Maubisse, Tersa (12/08).
Nu’udar Membru governu hakarak fahe saida mak nia iha hodi bele kontribui no dezenvolve Timor-Leste liuhusi juventude nia kreatividade.
“Governu hakarak fahe saida maka bele kontribui no saida maka ita bele halo hamutuk hodi dezenvolve rai ida ne’e, bá foinsa’e sira ita bo’ot sira maka sai ai-rin bá nasaun ida ne’e liliu bá ekonómia, kultura no saida de’it,”
Governante ne’e fo parabens ba joven produtivu ne’ebé halo grupu ba aihan hanesan modo no aifuan strowberry ho produtu sira seluk ne’ebé iha tanba ne’e hanesan fonte ida hodi hetan rendimentu ekonomia na’in liuhusi produtu agrikola.
Reprezentante Alumi Parlamentu Foinsa’e Timor-Leste (APFTL), Domingos Belo Mendonça de Jesus, informa, expozisaun ida ne’e Alumni Parlamentu Foinsa’e Timor-Leste (APFTL) hakarak konvida komunidade no juventude agrikultor sira bele mai partisipa saida maka durante ne’e halo iha kampu.
“Ami hakarak konvida ita nia komunidade no juventude agrikultór no produtór sira atu liga direita ho ita nia na’in ulun sira ne’ebé maka reprezentante governu daudauk ne’e kaer ukun atu bele mai partisipa nune’e bele rona no haree rasik joven sira nia atividade.” Domingos Mendonça.
Tanba loron ohin mós hanesan loron Mundiál ba Juventude internasional sira iha mundu tomak inklui Timor-Leste, tanba ne’e sira joven mak sai alternativu dezenvolvimentu.
“Ohin ita selebra loron internasionál juventude, mai fó tempu atu rona ami joventude sira nia lian hanesan kontribui bá diversifika ekonómia ne’ebé sai nu’udar alternativu bá ita nia rai, nu’udár joven produtór sira ne’ebé maka luta bá joven sira seluk.
“Ami nafatin hakarak aproxima ho Ministériu relevante sira hodi investe iha setór produtivu sira ne’e maka ami konsidera nu’udár alternativu diversifika ekonómia, tanba joven barak kreativu maibé balu iha areá rural.”
“Ami mai halo atividade expozisaun iha Rabilau atu governu bele hatene liután produtu sira ne’ebé joven sira halo iha areá rurál,”
Entretantu atividade media tour ne’e realiza tanba APFTL servisu hamutuk ho Oxfam Timor-Leste, Mata Dalan Institutu, AJTL, TILOFE, Ermera Ai-kulat Oraganiku, no Forum Joventude Defisiénsia Ermera.
Jornalista : Anis