Loluwari Média (RAEOA) – Lucia Falo, difisiente ho idade tinan 20, husi aldeia Makela, suku Taiboko, postu Pante Makasar, Oé-Cusse, moris ho kondisaun susar tanba defisiensia mental no seidauk hetan apoiu husi Ministériu Solidariedade Sosiál no Inkluzaun (MSSI). Tinan barak, Lucia hela de’it iha baraka ki’ik ne’ebé taka ho tali tahan, la seguru, iha tempu udan no anin.
Família haktu’ir kondisaun real ne’e aumenta hafoin Lucia nia inan mate no nia aman Domingos Falo, mos defisiensia fíziku, no laiha kapasidade atu sustenta. Nune’e família husu ba MSSI ajuda urgente ba familia Lucia.
“Ami taa tali tahan halo uma oan ida ba nia, maibé di’ak liu, se bele estadu halo uma foun ba nia atu nia bele seguru iha laran.” dehan Francisca Punef ba jornalista sira iha suku Taiboko, Pante Makasar Oé-Cusse, Sabadu (30/08).
Parte relevante sira hanesan Institutu Nasional Seguransa Sosial (INSS) no Ministériu Solidariedade Sosiál no Inkluzaun (MSSI) seidauk fornese subsidiu defisiensia ka sasan ajuda ida ba Lucia. Dokumentu identifikasaun mos seidauk kompletu, tanba prosesu administrativu lakon.
Iha sexta, Unidade Servisu Apoiu Sosial (SSAS) husi Prezidénsia Repúblika, lidera husi asesor Quintiliano Moniz Carvalho, hala’o vizita ba Lucia no nia aman. Nia promete sei koordena ho autoridade lokal atu halo uma mahon ida ba família no trata Lucia Falo nia dokumentu defisiensia.
“Ami haree kondisaun ne’e, família ne’e nia kondisaun grave tanba ne’e ami sei halo uma dignu ida ba nia, maibé la’os de’it ba nia mesak maibé ho nia família hotu, tanba aban bainrua nia presiza ambiente ne’ebé seguru atu moris hanesan ema hotu.”
Durante vizita, ekipa Prezidénsia republika mos fahe nesesidade bazika mina, fos, manu-tolun no osan ba komunidade ema ho difisensia.
Jornalista : Chay Risky