Loluwari Média (RAEOA) – Primeiru-Ministru (PM), Kay Rala Xanana Gusmão,atribui setifikadu títulu na’in ba rai ba komunidade hamutuk 205 iha ámbitu komemorasaun loron proklamasaun independénsia 28 Novembru ba dala 50 iha Rejiaun Administrativa Espesiál Oekusi Ambeno (RAEOA).
Diretór Diresaun Rejionál Terra Propriedade Oe-Cussi, José Ase Neno Colo, esplika benefisiáriu na’in-205 ne’e mai husi suku haat, suku Naimeko, Lalisuk no Lifau perténsia sub-rejiaun Pante Makasar no suku Suni-Ufe sub-rejiaun Nítibe.
“ohin Primeiru-Ministru simbolika de’it ba Nain hamutuk 44 hodi reprezenta 205 husi suku haat, depois mak ita sei kontinua atribui iha efidisíu terra propriedade.” Dehan Diretór Diresaun Rejionál Terra Propriedade Oé-Cusse, José Ase Neno Colo iha ambitu Selebrasaun loron proklamasaun independénsia 28 Novembru iha Rejiaun Administrativa Espesiál Oé-Cusse Ambeno (RAEOA), Sesta (28/11).
Atribuisaun sertifikadu títulu ne’e ba suku haat,ho prosesu ne’e kontinuasaun husi SNC nian ne’ebé halo ona levantementu ba sira-ne’ebé laiha disputa iha tinan hirak liu ba,no halo re-verifikasaun fila-fali, laiha ona disputa mak foin bele hetan.
Benefisiáriu Domingos Tefa nu’udar na’in ba rai, husi suku Naimeko, agradese ba Governu tanba prosesu levantamentu husi ekipa SNC halo tinan barak ona.
“Maibé ohin bele simu ona ha’u-nia direitu loloos ne’ebé ami hein tinan barak ona, ami agradese ba Nonu Governu liu-husi ekipa tékniku tanba antes ne’e sukat ami-nia rai iha suku, to’o ohin ami bele simu iha selebrasaun loron proklamasaun ne’e.”dehan nia.
Prosesu atribuisaun ne’e bazea ba lei númeru 13/2017, ne’ebé antes ne’e Sekretáriu Estadu Terra no Propriedade (SETP) liu-husi ekipa tékniku Sistema Nasionál Kadastru (SNC) hamutuk ho Diresaun Rejionál Terras no Propriedade Oé-Cusse halo ona re-levantamentu kadastru ba komunidade 200 iha suku haat referida
Jornalista : Cesar Pires
Editór:Herminio Cardoso