Loluwari Media (Lautém) – Entre Suku 34 ne’ebé iha Munisípiu Lautém, iha suku tolu mak sai vensedor ba kompetisaun livru 18 liu husi prosesu selesaun dezempeñu servisu autoridade lokál nian.
Prezidente Autoridade Munisipio Lautém (PAML), Melio de Jesus, hatete, suku 3 ne’ebé mak sai manan nain ba kompetisaun livru 18 iha nivel munisipiu Lautém mak suku Lore I, suku Serelau no Suku Bauro.
“Premio ne’ebe ke ohin ita entrega ne’e premio kompetisaun suku nível Munisípiu nian ne’ebé ke hala’o iha territóriu Nasionál tomak”dehan PAM Lautem ba jornalista sira hafoin selebrasaun loron proklamasaun unilateral da independensia da republika demokratika de timor-leste ba dala 50 nian iha munisipio lautém, sesta-feira 28/11/2025.
suku tolu ne’ebé sai vensedór mak primeiru lugar suku Lore I husi postu administrativu Lore, segundu lugar mak suku Serelau postu administrativu Lautém no terceiru lugar mak Suku Bauro postu administrativu Lospalos Vila.
PAM Lautem Melio haktuir, relasiona ho suku 3 ne’ebe selesionadu ba dezempeñu servisu ne’e liu husi prensimentu livru 18 ne’ebe mak kada suku hetan.
“Ba livru 18 ne’ebé ke ita fahe ona ba iha kada suku sira prensimentu livru 18 ne’e mak sei sai fatór determinante ba suku ninia avaliasaun dezempeñu ba sira nia servisu administrasaun ninian, lor-loron atendimentu publiku iha ita nia sosiedade”
Orsamemtu ba primeiru lugar hamutuk $1000,segundu lugar $750 no terseiru lugar $600 inklui sertifikadu apresiasaun ne’ebé Ministériu Administrasaun Estatál atribui ba sira.
Sefe suku Lore I Abilio Amaral kontente no orgullu tanba kompete iha nivel minisipál hodi hetan primeiru klasifikasaun.
“Nu’udar autoridade komunitaria sente orgullu tanba liu-husi kompetisaun suku,ami hetan primeiru lugar husi postu administrativu Lore no mós kompete iha nivel munisipal ami mós hetan primeiru klasifikasaun ba iha nivel Munisípiu,”dehan nia.
Autoridade lokál ne’e haktuir, Kompetisaun ida ne’e ho atividade liu-liu ba iha prensimentu livru 18 no mós ambiente suku ninian, monografia sira demografia sira, avalia mós kona-ba estrutura KPK ninian.
Konstrusaun uma ba ofisiál Polísia suku ne’ebé mak autoridade organiza husi komunidade no mós komunidade halo rasik uma ida hodi oferese ba iha instituisaun PNTL hodi uza atu hela no halo seguransa ba iha suku Lore I ninian.
Entretantu,Ekipa juri ne’ebé halo selesaun ba kriteria ne’ebé iha lori fila-fali ba iha Nasionál mak avaliasaun finál.
Jornalista: Alberto Pires
Editor: Herminio Cardoso