Loluwari Média – Entre Uma luxu nia klaran,iha uma kalen ida hamriik kleuk iha laletek Aldeia Fuslam suku Bairopite Postu Administrativu Dom Aleixo Munisípiu Dili.
La merese hanaran uma,maibé hanesan uma lixu ne’ebé Domingos dos Santos (58) Tara nia moris durante tinan 18 ne’ebé seidauk bele liberta aan husi baraka ki’ik ne’e.
Kalan nia toba, nia isin lulun an tanba laiha kama,iha uma ho medida 3×2 ne’e.iha kuartu ida de’it nakonu ho besi aat,lata mamuk,roupa foer ne’ebé nia hili iha lixu.
Domingos uluk hela hamutuk ho nia aman kiik iha hudi laran maibé iis laek ona,nia deside ba hela iha rai pedasuk ne’ebé rai nain oferese ba nia hodi hela.
Dadersan,rai-hun foin mutin,manu fuik semo sai husi nia knuuk, Domingos, haklili ona karo’on bosan iha nia kotuk sai husi nia toba fatin lao lemo-lemo haleu sidade dili hodi buka lata mamuk no besi aat sira.
Kaleen sukata ne’ebé ema soe iha lixu ne’e grasa ida ba nia hodi hili hodi halo uma,lata mamuk no besi aat sira seluk nia lori ba tetu hodi troka osan ba hahan nian.
“Ha’u toba ladi’ak,toba tenke silu ain, atu lolo ain mós araska tanba fatin toba kloot liu,udan-been tama hotu dala-ruma toba ho bokon de’it dala-ruma bokon sente malirin hader to’o loron de’it”Domingos Dos Santos konta ba Jornalista Loluwari.tl foin lalais ne’e.
Nia sente la seguru ba fatin ne’ebé nia isin presiza atu deskansa ho di’ak.
Tanba ne’e,Domingos husu governu atu hadia nia uma atu iha tempu kalan nia bele toba ho hakmatek no seguru.
Iha Tinan 2007 nia hanesan Traballador iha kompañia Dili United maibé bainhira nia sofre moras mear muta ran nia deside para servisu.
“Ha’u moras mear dala-ruma muta ran ha’u sente moras atu mate” dehan nia.
Husi ne’e,bainhira nia para servisu komesa Ai-han menus ba nia,nune’e nia buka hili lata mamuk hodi faan.
“Dader atu ba hili kalen aat ha’u lori bee agua ki’ik ida tau iha pasta lori lao husi uma to’o dolokoan mak mai”dehan nia.
Bainhira nia hamlaha iha dalan,dala-ruma ema sosa hahan ba nia,maibé sorte aat karik laiha entaun nia kesi kabun to’o fila uma mak han.
Kalen aat sira ne’ebé nia hili laos lori kedas ba tetu maibé tau hamutuk barak mak hafoin nia tuku tau ba karo’on lori ba tetu iha Tibar.
Osan husi lata mamuk ne’e foos karon ida mós dala-ruma sosa la kotu.
“Dala-ruma ha’u hanoin mós la to’o oan (jornalista), ha’u ba husu etu iha viziñu nia uma dala-ruma mós ha’u foti sira nia foos mai tein”nia konta ho matan ben.
Domingos inan-aman laiha, nia feton sira mós mate hotu ona,nia maun alin uma laran mós laiha,nia hela mesak hodi hasoru moris terus ne’e.
Vizinu Alexandre Soares sai sasin ,Domingos moris terus dunik ne’ebé presiza hetan tulun husi governu.
“Nia ne’e merese governu atu tau matan ba nia soke ate agora governu seidauk mai haree nia kondisaun moris,nia uma ne’e taka ho kalen didin ho kalen nakonu ho besi at kalen at kuitadu los nia uma oan ne’e”dehan nia.
Nune’e mós Xefe Suku Bairo-Pite Joaninha Alves Soares fó korajen ba Domingos Dos Santos tanba kontinua re-ejiste hodi luta mesak ba nia moris.
“Ha’u hanesan lider Komunitariu ami sempre atende dala-ruma ami fó nesesariu balun ne’ebé governu fó atensaun ba nia liu-husi emprezáriu balun fó ajuda ba nia no dala-ruma ami fó kampu traballu ba nia liu-husi Programa PNDS nian tanba ami konsidera hanesan vulneravel”dehan nia.
Atu harii uma,Nia dehan,rai ne’ebé agora dadaun nia hela ne’e laos ninian tanba ne’e Autoridade Lokál atu kria kondisaun mahon dignu ba nia mak problema estatuta rai.
“Ami halo ona karta ba MSSI maibé seidauk mai fó apoiu ba nia”dehan nia.
Iha parte seluk Sidadaun Januario Soares promete atu hadia nia uma ne’ebé la seguru ona.
Sidadaun Januario mós apoiu ona nesesidade bázika ba Domingos hanesan foos no sasan sira seluk inklui kulsaun kiik ida maibé toba fatin la própriu atu tau.
Iha parte seluk Bainhira Jornalista Loluwari aprezenta Domingos nia problema ba Ministériu Solidariedade Sosiál Inkluzaun (MSSI),ekipa halo kedas intervensaun apoiu nesesidade báziku ba nia.
Tanba ne’e,Diretóra Ministériu Solidariedade Sosiál Inkluzaun (MSSI) Munisípiu Díli Eva Mendonça hatete,misaun ida ne’ebé MSSI tenke halo ba komunidade em jeral iha munisípiu no mós iha Dili.
“Hanesan ita nia komunidade (Domingos dos Santos) ida ohin nia merese duni apoiu husi MSSI no ba oin ami sei apoiu regular ne’ebé mak MSSI iha tuir Vizaun no Misaun MSSI nian”dehan nia.
Kada fulan tolu,Tuir Diretora Eva,MSSI sei vizita Domingos Santos hodi fornese sasan sira hanesan nesesidade bázika.
“ohin ita boot haree ita direitamente entrega tanba ne’e knaar MSSI nian ba sidadaun hotu-hotu ne’ebé ho kondisaun Vulneravel”dehan nia.
Kona-ba nia kondisaun hela fatin,Tuir Nia, ne’e MSSI seidauk iha planu atu tau orsamentu ba direitamente ho konstrusaun fiziku, maibé husi MSSI nia observasaun MSSI bele husu mós ba Ministériu seluk atu kolabora mós ba entidades Vulneravel sira.
Tanba Kada tinan MSSI apoiu ba komunidade vulneravel sira ne’e tenke iha relatoriu hafoin hetan asesmentu.
Jornalista :Cesar Pires
Editór: Herminio Cardoso