Loluwari Média (Díli) – Fulan rua ona Lei Pensaun Mensál Vitalísia (LPMV) ne’ebé kamada Estudante Universitariu Timor-Leste (EUTL), ezije to’o agora Prezidente Tribunál Rekursu (PTR) seidauk foti desizaun hodi Anúnsia rejultadu Konstituisionál ka Inkonstituisionál.
Tanba Prezidente Repúblika Promulga Lei Pensaun ne’e desde iha fulan setembru tinan ne’e no atu tama ona tinan foun 2026 maibé seidauk iha desizaun finál.
Ho ezijensia públiku ne’e, Prezidente Tribunál Rekursu (PTR),Afonso Carmona, lakohi fó komentáriu tanba prosesu sei la’o hela.
“prosesu ne’e distribuisaun ba juis, entaun juis titulár ne’e sei halo prosesu, tanba tenke halo notifikasaun ba parte autoridade ruma fó resposta buat sira ne’e sei la’o, tanba ne’e labele termina bainhira”
“Agora importante nia (prosesu) la’o, tanba ha’u labele halo prediksaun katak,fulan ida hotu,tanba depende nia prosesu,importante nia andamentu la’o”Dehan Prezidente Tribunál Rekursu (PTR), Afonso Carmona ba jornalista sira iha Palásiu Prezidensiál Bairo-Pite Díli hafoin enkontru ho Prezidente Repúblika, Segunda (15/12).
Tanba ne’e,Nia dehan,hein de’it juis sira sei halo termina prosesu no nia prontu simu konsekuensia.
“entaun ita hein juis ne’e sei termina nia prosesu, depois ikus mai sei envolve juis na’in hira atu halo deliberasaun,Tanba ne’e ita hein, ha’u labele komentáriu, see lae imi dehan Prezidente Tribunál Rekursu, mak halo buat sira ne’e, la’os buat ne’e regras, ita tenke tuir nia prosesuál, tanba ha’u prontu hasoru konsekuensia oi-oin.”dehan nia.
Prezidente PRT,esplika Importante nia prosesu la’o tuir dalan, ida ne’e mak públiku tenke hein oituan tanba prosesu Parlamentu Nasionál deside, agora mosu fali husi Provedór Direitus Justisa no Humanus.
Kona-ba Manifestasaun EUTL,Nia dehan,ne’e direitu EUTL nian tanba liberdade mós iha limitasaun.
“halo manifestasaun ne’e sira nia direitu, agora nusa mak ita bele bandu, agora Timor ne’e nasaun liberdade demokrátiku, maibé labele liberdade liu, nia iha limitasaun,Agora orgaun soberanu sira mós sira nia kompetensia, imi mós labele tama problema, ne’ebé buat hotu-hotu la’o iha demokrásia, ita respeitu.”dehan nia.
Nia dehan,nia parte konkorda asaun EUTL ne’ebé halo kontrolu sosiál maibé la influénsia ba desizaun Tribunál nian.
“Ha’u hatete bei-beik kontrolu sosiál ne’e importante, ita respeitu maibé la influénsia desizaun Tribunál, tanba desizaun Tribunál ne’e hodi povu nia naran, tan ne’e saida mak Tribunál deside, karik la simu iha nia no kontradis, la’ós Tribunál deside imi simu de’it.”dehan nia.
Alende ne’e,Pedidu fiskalizasaun abstratatu husi benifisiáriu,PRT sei anusnia iha tempu badak iha anu judisiáriu.
“ha’u sei relata konvida imi hotu (jornalista) tanba iha ne’eba parte hotu-hotu sei halo nia rezumu nune’e relatóriu ne’eba sei fó hotu sai, Tanba ne’e ha’u labele temi hira-hira”dehan nia
Jornalista : Cesar Pires
Editór: Herminio Cardoso