Loluwari Media (Díli) – Xefe Departamentu Investigasaun Kriminal Nasional (DIKN), Superintendente Polísia João Belo dos Reis, hatete, Polísia Nasionál Timor-Leste (PNTL) liu-hosi Departamentu Investigasaun Kriminal Nasional bazeia ba keisa ne’ebé ofendidu ka vitima partisipa misa iha igreja Balide nia motor lakon hafoin misa informa kedas ba Polísia hodi kaptura suspeitu na’in 3 iha merkadu Taibessi.
“Informasaun ne’ebé vitima hato’o ba polísia liuhusi servisu Informasaun, polísia halo tracking no buka tu’ir paradeiru husi suspeitu no motorizada ne’ebé mak sira na’ok hodi lori mai iha Departamentu Investigasaun kriminál Nasional hodi entrega ba Ministeriu Publiku (MP).” Dehan Xefe Departamentu Investigasaun Kriminal Nasional (DIKN), Superintendente Polísia, João Belo dos Reis, ba jornalista sira iha kuartel General PNTL, Kaikoli, Dili, kuarta (08/01).
Joâo Belo, hatete, PNTL sei la tolera suspeitu sira ne’ebé na’ok ema motorizada iha kapital Dili no mos iha munisípiu, tanba krime organizadu sira ne’e autoridade seguransa PNTL sei la tolera.
“Horseik 07 Janeiru 2025 mais ou menus tuku 2 ho balu ita nia servisu Informasaun Polísia detekta movimentu suspeitu iha area Taibessi merkadu nian nune’e servisu Informasaun Polísia halo kedas intervensaun no kaptura Suspeitu na’in 3 ho evidensia motor ho sapa matrikula P 1101 hodi entrega ba iha servisu Investigasaun Polísia.”
“Horikalan suspeitu halo detensaun iha komandu munisípiu Díli no prosesu ne’e remata, DIKN sei aprezenta ba ministeriu publiku (MP), tanba kazu ne’e rejista ho numeru nuc 0012/2025/PSIK.
“Suspeitu na’in 3 ho inisial JMS, JMN no SX. Sira na’in tolu kaptura ho motorizada no na’in rua kaptura tu’ir informasaun ne’ebé suspeitu aprezenta. Ita halo tracking ho sira balu, suspeitu antigu no balu foun tanba ne’e PNTL informa ba publiku katak ita la fo dalan ba suspeitu krime organizadu sira halo asaun krime na’ok ema nia sasan iha Dili laran ka iha munisípiu. Ita sei buka tu’ir suspeitu sira no ita nia servisu Informasaun Polísia sei buka tu’ir suspeitu sira ne’ebé na’ok ema nia sasan no halo problema depois aprezenta ba Tribunal tuir asaun ne’ebé sira komete.”
Jornalista : Chay Risky