Loluwari Media (Díli) – Xefe Departementu Investigasaun Kriminal Nasional (DIKN), Superintendente Polísia, João Belo dos Reis, husu, atu halo ezame regozu ba bala musan ne’ebé ema deskuñesidu tiru iha rezidensia eis xefe estadu Francisco Guterres Lú-Olo, iha 01 Janeiru 2025 madrugada tuku 1 liu minutu 30 bainhira komunidade sira antusiaziasmu tiru fugetes nune’e ema deskuñesidu akompaña tiru bala real ba leten hodi tun kona rejidensia Eis xefe estadu Lú-Olo.
“Ho rapidamente DIKN no tekniku Forensik nian ami halo rekursisaun ba fatin akontesimentu hodi identifika katak bala musan ne’e monu duni iha ne’eba, no ami hatene katak rejulta tiru ba leten no bala musan ne’ebé monu husi 9 mili metru maibé ita seidauk hatene loloos bala musan ne’e mai husi kilat tipu ida ne’ebé maibé ita hatene katak ne’e mai husi kilat ki’ik maibé ba pistola ida ne’ebé los Revolver ka Blokest ita seidauk hatene loloos.” Dehan Xefe DIKN, Superintendente Polísia, João Belo dos Reis, ba jornalista sira iha Kuartel Jerál PNTL, Kaikoli, Dili, tersa (07/01).
Superior ne’e esplika, ema ne’ebé publika iha media sosial dehan bala musan ne’e mai husi kilat Revolver ne’e la loos, tanba prosesu investigasaun seidauk identifika loloos.
“Ami lori kazu ne’e ba aprezenta iha Ministeriu Publiku (MP) tanba ami halo identifikasaun no rekonstrusaun iha fatin akontesimentu hodi aprezenta ba MP ho Nuk 003/2025 PSIK, no ami husu apoiu parseiru sira atu halo ezame ba bala musan ne’e ita hetan no ita husu ita nia parseiru sira atu halo exame balestiku ba bala musan neebe ita hetan.”
“PNTL husu apoiu ba komunidade hotu ka individu balu ne’ebé haree ema ruma tiru iha tempu ne’eba husu atu fo hatene ba PNTL atu halo prosesu investigasaun klean, tanba ate agora ema ne’ebé tiru PNTL seidauk hatene no sei deskuñesidu hela.
“Ami sei husu ba ita nia parseiru sira tantu husi rai laran nomos iha rai liur atu bele halo ezame ba bala musan ne’e tanba la’os akontese iha eis-Prezidente Republika Lú-Olo nia rezidensia de’it maibé akontese mos iha parte balu bala musan kona labarik feto ho idade tinan 5 nia ain, no agora hala’o hela tratamentu iha Hospital Nasional Guido Valadares (HNGV).” Nia afirma.
PNTL sei identifika ema deskuñesidu ne’ebé tiru bala musan ne’e grupu organizadu maibé husi prosesu investigasaun mak determina. Se de’it mak utiliza kilat ne’e tanba bainhira kilat ne’ebé tiru ba leten tun mai sempre oho ema nune’e husu ba ita hotu atu hein rejultadu investigasaun.
“Ami husu ba komunidade iha Areadores eis Prezidente Repúblika Lú-Olo nian karik ema ruma hatene fo hatene ba PNTL, atu identifika se bainhira parseiru sira identifika bala musan ne’e, mak se de’it mak hela besik iha Areadores Eis PR Lú-Olo nia rezidensia ami sei investiga hotu.”
Jornalista : Chay Risky