Loluwari Média (Díli) – Embaixadora Xina, Wang Wenli, hatete, governu Xina aprova ona kooperasaun ho governu Timor-Leste atu konstrui hospital militar andar ualu (8) inklui jardim iha parte tasi ibun.
“Governu Xina ho governu Timor-Leste, ko’alia tiha ona atu hari’i ospital ba ita nia veterenus no militar sira no konstrui jardim ida iha tasi ibun. kona ba hospital, ita hetan ona aprovasaun husi governu Xina.” Dehan Embaxadora Xina, Wang Wenli, ba jornalista sira, hafoin reuniaun tripartida entre Embaixadora Xina ho Komandu PNTL inklui Asosiasaun emprezariu Xina iha Timor-Leste ba dala rua iha Embaixada Xina, tersa (25/02).
Diplomata ne’e, subliña, tempu badak governu Xina sei loke konkursu ba konstrusaun refere nune’e empreza sira bele hahu hala’o servisu..
“Tu’ir mai ami sei loke tender ba kompania sira atu konstrusaun realiza obra ida ne’e.”
Tu’ir planu konstrusaun hospital militar andar ualu sei konstrui iha suku Fatuhada, postu administrativu Dom Aleixo, munisipiu Dili.
Konstrusaun hospital militar ne’e importante tebes atu fo asistensia saúde ba pasiente sira ne’ebé sempre halo tratamentu ba sira nia moras iha rai liur.
Presenza hospital militar ne’e rasik governu sei reduz gastus orsamentu ba tratamentu saúde ne’ebé kada tinan sempre aloka orsamentu ho montante ne’ebé bo’ot ba pasiente sira. Inklui kria kampu tarballu ba timor oan atu servisu iha rai laran.
Antes ne’e Ministru Defeza, Kontra Almirante, Donaciano Costa Gomes “Pedro Klamar Fuik” iha 9 janeiru 2025, afirma governu Xina aseita ona atu hari’i ospital militar andar ualu. Nunee Ministeriu Defeza sei kria komisaun ida hodi tau matan ba konstrusaun ospital militar refere.
Jornalista : Chay Risky