Loluwari Média (Díli) – Prezidente Komisaun Reguladora Artemarsiais (KRAM), Octavio da Conçeição, hatete, membru organizasaun arte Marsiais (OAM) husi Persaudaraan Setia Hati Terate (PSHT) no Ikatan Kera Sakti (IKS) ne’ebé la obedese ba rejolusaun governu numeru 22/2025 hodi utiliza atributu ba vizita Na’in feto Ramelau.
Nia hatete, iha loron 07 Juñu, iha suku Lahae, postu administrativu Aileu, area Daisoli nian Komandu PNTL Munisipiu Aileu halo pasarevista ba jovens sira ne’ebé mak peregrina ba Na’in Feto Ramelau ne’ebé uza atributu OAM nian.
“Ita nia jovens sira ne’ebé ho motor maibé utiliza Farda OAM nian no mos pasang fali ho sira nia jurus tanba ne’e mak ita nia PNTL munisípiu Aileu halo kapturasaun ba sira iha area Daisoli, postu administrativu Aileu, munisípiu Aileu.”
Nia relata, horseik mós Autoridade Migrasaun asegura Farda OAM husi Arte-Marsiais PSHT no IKS nian ne’ebé mai husi rai liur tanba ne’e mak Migrasaun prende.
“Aktu sira ne’e ita konsidera hanesan infrasaun ou inkomprimentu legal ba iha orden Estadu nian liuhusi rejolusaun governu numeru 22/2025 nian.”
Iha mos publisidade estudante sira ne’ebé utiliza farda eskola nian maibé hakerek Arte-Marsiais iha farda eskola, tanba ne’e KRAM konsidera la kumpri rejolusaun governu.
“Tanba ne’e mak ami husu ba dirijente eskola sekundariu sira atu kontrola nia estudante sira para ba eskola karik labele pinta ou hakerek naran Arte-Marsiais iha farda eskola.”
“Ami husu ba lideransa Arte-Marsiais sira atu kolabora ho Autoridade seguransa liliu Ofisiál Polísia Suku (OPS) sira, atu nune’e ita hotu servisu hamutuk hodi kumpri nafatin rejolusaun ne’ebé governu fo sai no ita hein to’o loron 31 Dezembru, tinan ne’e bainhira governu deside loke hikas atu ita kumpri hamutuk desizaun governu tu’ir mai.”
Jornalista : Chay Risky