Loluwari Média (Díli) – Komandante Munisípiu Díli (KMD), Superintendente Xefe Polísia, Orlando Gomes, informa, hahu husi inisiu janeiru to’o iha Juñu 2025, konflitu iha fatin publiku entre joven sira, hahu menus, tanba hetan vizilansia makaas husi Autoridade Seguransa (PNTL).
Polisia Nasionál Timor-Leste (PNTL), liuhusi Komandu Munisípiu Dili (KMD), optimista, iha 2025 konflitu sira iha kapital Dili, hahú menus, tanba kontrola makaas, kompara ho konflitu iha tinan 2024 né’ebé konsidera aas.
Tanba ne’e, ho konflitu ne’ebé menus, komandante munisípiu Dili (KMD), orienta ona membru polisia sira atu mantein kontrola seguransa iha fatin sira ne’ebé mak identifikadu risku bá konflitu.
“Kona-bá situasaun jeral iha munisípiu Dili, komandu orienta nafatin bá ita nía esquadra sira no ita nía tranzitu atu kontinua monotoriza no akompaña situasaun liuhusi patrullamentu iha tempu kalan no loron, nune’e atu observa situasaun hotu atu halo prevensaun bá kualker krime ka konflitu ne’ebé mak mosu.” Dehan Komandante Munisípiu Díli (KMD), Superintendente Xefe Polísia, Orlando Gomes, bá jornalista sira, iha Komandu Munisípiu Dili, Tersa (17/06).
Superior ne’e promote, sei halo esforsu oi-oin hodi bele neutraliza situasaun hotu-hotu iha Dili-laran.
“Ita mos lansa ona, ita nía servisu Informasaun polisia, tantu husi informasaun sekreta konjuntu ninian tun iha terenu no ita nía patrullamentu husi esquadra no forsa rezerva sira nafatin tun iha terenu, iha komunidade nia le’et, halo movimentu atu asegura situasaun.”
“Problema balu nafatin mosu, maibé Autoridade Seguransa kontinua nafatin halo vizilansia iha tempu kalan no loron bá iha bairru-bairru sira, atu minimiza problema konflitu sira ne’ebé mak mosu. No durante ne’e, situasaun iha Dili la’o ho di’ak, maske iha problema pesoal no partikular sira mak mosu, maibé PNTL kontinua nafatin halo vizilansia hodi halo prevensaun bá konflitu.”
Tanba konflitu iha Dili hahu menus, kompara tinan-kotuk ne’ebé akontese iha fatin-fatin.
“Situasaun konflitu sira akontese iha tinan kotuk, sai hanesan referensia ida mai iha komandu, para atu nune’e bele ativa makaas vizilansia atu bele reduz bá konflitu sira ne’e. Uluk ne’ebé mak sa’e agora daudauk hahu menus, tanba ita koloka OPS no patrullamentu husi esquadra sira tun iha terenu, atu halo prevensaun bá konflitu sira.”
Enkuantu, Komandu PNTL Munisípiu Dili, seidauk sukat persentajen (%) konflitu entre tinan kotuk no mos iha tinan né’e iha bairru sira iha Dili laran.
“Ita seidauk iha persentajen, maibé ita haree katak, situasaun la’o di’ak.”
Jornalista : Chay Risky