Loluwari Média (RAEOA) – Presidente Repúblika (PR) kontinua fahe prezente Natál tinan 2025 nian ba Koléjiu Nossa Senhora do Carmo iha Rejiaun Administrativa Espesial Oé-Cusse Ambeno (RAEOA).
Reprezenta Palásiu Prezidensiál, Koordenadora Servisu Sosiédade Sivil no Asuntu Sosiál, Teresa Dos Ximenes hatete, molok tinan foun 2026 PR Horta sempre halo apoiu nesesidade bázika ba orfonaru sira.
“Ohin ita lori prezente Natál nian mai iha Koléjiu Nossa Senhora do Carmo mak nesésidade báziku Fós, Mina, Supreme, Sardina, Mantolu, kafé, Masin midar, Rinso Supermie no Dellos inklui ekipamentus mak Manta no Farda Desportu nian ne’e hanesan prezente Natál nian ba Orfanatu no uma mahon iha RAEOA.” Dehan Coordenadora Servisu Sosiédade Sivil no Asuntu Sosiál Prezidensia Repúblika, Teresa Dos Ximenes ba Jornalista Loluwari.tl iha Baucnanan Citrana, Segunda (17/11).
Tuir Nia, Ekipa Sosiédade Sivil Apoiu Sosiál Palásiu Prezidensiál distribui nesésidade báziku no ekipamentus desportu nian ba Koléjiu Nossa Senhora do Carmo no sei kontinua ba Orfanatu Topo Honis.
“Prezente simples ne’ebé ita nia sua Selensia Prezidente Repúblika oferese ba nia komunidade liu-liu jovens foin-sa’e sira ne’ebé hela iha Orfanatu no Uma Mahon ne’e atu bele ajuda sira iha tempu badak”dehan nia.
Nia dehan,ekipa lori Prezidente Repúblika nia naran fó ksolok Natál no tinan foun 2025 nian ba Estudante sira tanba sira mak futuru nasaun nian.
Responsavel Kongregasaun Koléjiu Nossa Senhora do Carmo Oé-Cusse, Irmã Orlandina Xavier Fatima, Lori Koléjiu Nossa Senhora do Carmo Oé-Cusse hato’o obrigadu no agradese ba Prezidente Repúblika (PR), José Ramos Horta ne’ebé sempre tau matan ba sira.
“Ami agradese tebes ba Prezidente Repúblika (PR), José Ramos Horta ne’ebé ho laran luak ne’ebé sempre tau matan mai ami Koléjiu no Orfanatu sira iha RAEOA”dehan nia.
Koléjiu ne’e hein katak ajudu sira ne’e fó motivasaun ba estudante sira atu sira bele estuda didi’ak atu nune’e iha futuru sira sai feto ne’ebé di’ak ba rai no ba nasaun ida ne’e.
Nia dehan,Orfanatu sente la mesak tanba Prezidente Repúblika sempre tau matan ba sira no husu Prezidente Repúblika atu kuidadu saúde ho didiak hodi kontinua nia kna’ar ne’e ho di’ak.
“hein katak Natál no tinan foun ida ne’e Jesus moris iha Prezidente Repúblika ho nia ekipa tomak nia fuan hanesan Jesus uluk moris iha Belem hanesan moris iha imi ida-idak nia fuan”hatete nia.
Reprezentante Estudante Kolegio Nossa Senhora do Carmo Oé-Cusse, Aliansa Tacu Sequera Neno hatete,agrades no espera PR Horta bele iha kondisaun saúde ne’ebé di’ak hodi servi rai no povu TL.
“ami nia feliz natál ba Prezidente Repúblika ami espera katak Sua Excelénsia Prezidente Repúblika bele haksolok nafatin iha Natál no Tinan foun ida ne’e”dehan nia.
Entretantu estudante sira ne’ebé hela iha orfonatu hamutuk 28 mesak feto hotu de’it.
Jornalista : Cesar Pires
Editór:Herminio Cardoso