Loluwari Média (RAEOA) – Díli Institute Off Téknolojia (DIT), realiza orientasaun ba estudante foun sira atu tenke hatene uluk ambiente Universidade nian.
Diretór DIT Oe-Cusse,João Muni hatete, orientasaun tinan akadémiku 2026 ne’e sai ona kultura ba Universidade atu fó orientasaun molok simu materia.
“Prinsipiu husi orientasaun ne’e katak iha inisiu husi estudante sira atu buka matenek iha fatin ida ne’e, maka tenke hatene ambiente Kampus nian, prosesu Akademiku, prosesu rekursu umanu, Administrasaun no seluk-seluk tan” Dehan Diretór Díli Institute Off Téknolojia (DIT), João Muni, ba jornalista sira iha Kampus Rejional Enklave Oé-Cusse Ambeno, Tersa (10/02).
Diretór ne’e hatete,estudante foun sira ne’e presiza koñese ba sira ninia area rasik no ambiente DIT nian. Nune’e bele prepara sira nia rekursu ne’ebe ho di’ak hanesan Universidade.
Nia dehan,husi orientasaun ne’e sei orienta estudante sira hodi bele sai ema ne’ebe iha konsentrasaun ba Departamentu, ne’ebe sira hili ona iha DIT.
“Saida mak Kampus sei halo ba sira durante orientasaun mak sei iha atividade tolu ne’ebé sira tenke hala’o”
Nia dehan, primeiru estudante sira tenke koñese Instituisaun Kampus laran tomak,segundu atu haforsa patriotizmu no nasionalizmu liu-husi diskursu, formasaun no formatura markar pasu nian.
No ikus mak halo estudante sira hodi hadomi ambiente katak sei halo Kampus sai ambiente ne’ebe maka di’ak, buras, bonita no bonito.
Nune’e mós estudante iha parte komunidade nian, sira tenke hadomi nia ambiente ida ne’ebe moos, sustentavel no saudavel ba ema hotu, labele soe foer arbiru, tenke hadia Eskola ho di’ak.
Enkuantu Estudante foun sira, ne’ebe daudauk tuir orientasaun mak hamutuk 110, kompostu husi Departamentu haat ne’ebe Estudante sira sei tuir aula dader ka reguler hotu.
Iha fatin hanesan Prezidente Komisaun Organizadora ba Kampus Rejional Enklave Oé-Cusse, Octoviano Babu Colo agradese ba estudante foun sira ne’ebe mak tama ona knua DIT.
Tuia Nia,DIT mak sai Sentru hodi rezolve ema hotu nia preokupasaun, liu-liu iha area Edukasaun, tanba ne’e tenke hamutuk hodi luta no dunik méhi idade nian.
Totál husi estudante foun na’in 110 ne’e kompostu husi Departamentu haat(4) maka hanesan; Departamentu Jestaun Jeral, Jestaun Finansas, Komputer Science no Civil Enjinerig.
Entretantu Tinan ne’e, Universidade DIT iha Oé-Cusse realiza serimónia abertura orientasaun ba estudante foun ho tema (Rikusoin lolos mak ita nia rekursu humanu) atu bele investe iha kapitál humanu hodi dezenvolve TL iha futuru.
Jornalista Estajiáriu : Imaculada Tefa
Editór : Herminio Cardoso