Loluwari Média (Díli) – Diretór Diresaun Servisu Investigasaun Kriminál (DSIK), Superintendente Polísia João Belo dos Reis hatete, Sidadaun ida ho idade 72 mate iha mota Memo Munisípiu Bobonaro Postu Administrativu Maliana Sucu Tapo-Memo.
Ho indentifikasaun ne’e hatudu katak, sidadaun ne’e moris iha indonezia maibé nia militar reformadu indonezia nian ne’ebé mate iha mota Memo ne’ebé mai vizita nia familia sira mak hetan dezastre ne’e.
“Maibé parte Autoridade Seguransa Polisia Repúblika Indonézia (POLRI) sira rekonese katak. Matebian ne’e sidadaun indonezia nian entaun prosesu tomak ita intrega ba sira iha Autoridade Seguransa POLRI nian.” Dehan Diretór Diresaun Servisu Investigasaun Kriminál (DSIK), Superintendente Polísia João Belo dos Reis ba jornalista sira iha Kuartel Jerál PNTL Kaikoli Dili, tersa (20/01).
Tuir Nia, Sidadaun indonezia ne’e deskonfia mota mak lori maibé prosesu investigasaun tomak iha sira nia liman ne’ebé sira sei update ba PNTL Liu-husi DSIK nian kona-ba prosesu ne’e rasik.
“Familia ne’ebé babain matebian mai iha nia uma Sucu Tapo-Memo ne’e ita foti ona informasaun, liu husi komandu Munisípiu Bobonaro husi Seksaun Investigasaun Kriminál Munisípiu Bobonaro nian bolu ona sira atu foti informasaun relativamente ba kazu ne’ebé mak akontese iha ne’eba.”
Jornalista : Cesar Pires
Editór : Herminio Cardoso