Loluwari Média (Baucau) – Palasiu Prezidénsia liu husi Unidade Servisu Apoiu Sosiédade Sivil (SASS) apoiu nesésidade báziku ba komunidade moras lepra iha suku Tirilolo Aldeia Osova Munisípiu Baucau.
Asesór SASS Quintiliano Moniz Carvalho hatete, Ekipa SASS ohin lori nesésidade báziku mai iha Sucu Tirilolo Aldeia Osova fo apoiu ba komunidade ne’ebé durante ne’e hetan moras Lepra.
“Iha informasaun husi ita nia Staf Palásiu Prezidensiál katak iha Aldeia Osova ida ne’e ita nia komunidade ne’ebé moras Lepra hamutuk 15 ho nune’e nai Prezidente Repúblika orienta mai ha’u katak prepara nesésidade báziku ruma ba haree took sira nia kondisaun.”dehan Asesór Quintiliano Moniz Carvalho ba jornalista sira iha Aldeia Afasa Baucau, Kinta (22/01).
Quintiliano hatete, Ekipa lori nesésidade báziku hanesan Fós, mina no Ekipamentus desportu nian ba jovens sira iha Aldeia Afasa ne’e rasik.
“Ami hein nafatin Autoridade Lokál husi Sucu Tirilolo no Aldeia Osova sira atu hato’o pedidu ida ba nai Prezidente Repúblika kona-ba komunidade ne’ebé presiza tulun husi PR no mós governu.”dehan nia.
Xefe Suku Tirilolo Lori Estrutura Sucu Tirilolo nia naran hato’o obrigadu ba Prezidente Repúblika mesmu apoiu ituan ka barak konsege to’o ona nia komunidade nia uma liu-liu ba komunidade ne’ebé hetan moras Lepra.
Tuir Nia,Iha sucu Tirilolo iha Aldeia neen mak hanesan Lutu-Mutu, Betulale, Osova, Lia-Lesuk, Parlamentu no Kaisidu.
“ha’u nia komunidade ne’ebé moras Lepra ho apoiu husi PR ne’e ha’u husu laos komunidade iha Aldeia Osova de’it mak hetan moras Lepra maibé husi Aldeia sira seluk mós hetan hotu moras Lepra karik ba oin bele ajuda mós ba ha’u nia komunidade husi aldei 5 ne’e hotu.”
Total Populasaun iha Sucu Tirilolo hamutuk Rihun Sanulu Resin no komunidade sira ne’e mesak moris vida agrikultór.
Jornalista : Cesar Pires
Editor:Herminio Cardoso