Loluwari Média (Díli) – Komandante Departementu Investigasaun Kriminal Nasional (DIKN), Superintendente polisia, João Belo dos Reis, hatete, iha loron 01 fulan Dezembru 2024 mais ou menus tuku 2 liu minutu 30 madrugada Servisu Nasionál Inteligensia (SNI), Unidade Patrullamentu Maritima (UPM) inklui Naval halo operasaun hodi prende Fugetes kaisa 4 ho montante 8 shoot hamutuk 288 tanba Diskunfia oknum PNTL balu iha laran.
“Epin Flavors hamutuk kaisa 8 ne’ebé operasaun koordenada prende hela sasan kontra bandu ne’ebé mak hetan hodi prende ho evidensia sira ne’e, ami lori mai ona iha Departamentu Investigasaun Kriminal Nasional hodi halo prosesu ba tribunal.” Dehan Komandante Departamentu Investigasaun Kriminal Nasional (DIKN), Superintendente polisia, João Belo dos Reis, ba jornalista sira iha komandu Jeral PNTL Kaikoli, Dili, Segunda (02/12).
Belo hatete, nu’udar autoridade seguransa PNTL kontinua kontrola ba sasan ne’ebé kontra bandu atu tama iha teritoriu nasionál Timor-Leste, bainhira se de’it mak hatama sasan kontra bandu mak PNTL kaptura mak na’in sei ba hatan iha Tribunal.
“Sasan sira ne’ebé ami prende iha area Liquiça palam iha ne’eba detekta katak involvimentu mos oknum PNTL balu nune’e prosesu Investigasaun sei la’o hela, bainhira Investigasaun termina mak sira sala ou la sala nomos Investigasaun Kriminal sei aprezenta relatoriu ne’ebé ami halo kona-ba asaun ne’ebé ami halo ba sua exlensia Komandante Jerál PNTL atu hatene.”
“Kazu ne’e rasik ohin DIKN rejista ona ba Ministeriu Publiku (MP). Tanba MP mak na’in ba kazu ne’e no bainhira iha informasaun balu DIKN sei update ba prosesu sira ne’ebé sira halo hela.”
“Oknum PNTL ne’ebé inklina an iha kazu ne’e sei iha prosesu Investigasaun nia laran bainhira hetan duni oknum PNTL sira halo asaun kontra lei mak komandu sei foti medidas ba iha Departamentu Investigasaun Kriminal Nasional no sei aprezenta ba MP.” Nia argumenta.
“Oknum PNTL ne’ebé inklina an iha kazu ne’e ohin ami bolu ona mai DIKN no orsida lokraik balu sei mai tan no ita sei rona saida mak sira ko’alia. Tanba operasaun koordenada halo iha komandu munisipiu, tanba ita lakohi Fugetes lubuk ida ne’e tama mai iha kapital Dili atu nune’e labarik sira utiliza ba bairru-bairru halo perturbasaun ba ema toba la hakmatek no ema moras bele aumenta moras inklui labarik ki’ik sira deskansa ladiak no fo perturbasaun ba orden publika ba bairru ne’ebé sempre sunu Fugetes sira ne’e.”
Tanba Fugetes ne’ebé tiru ne’e fo perigu ba ema nia vida, ema nia deskansa no ema nia direitu atu goza sira nia vida. Tanba ne’e mak PNTL halo intervensaun nafatin, no sasan sira ne’ebé PNTL prende sei aprezenta ba MP no MP sei entrga ba Tribunal no Tribunal mak sei termina nia destinu.
“Oknum PNTL ne’ebé involve iha kazu ne’e DIKN diskunfia membru PNTL munisípiu na’in 4 maibé hein prosesu Investigasaun mak determina, no kazu ne’e rasik ho numeru nuk 030324 PNSIK.”
To’o publikasaun nutisia ne’e loluwari.tl seidauk halo konfirmasaun ba oknum sira ne’ebé sai autor hatama fugetes tanba sei halo investigasaun.
Jornalista : Chay Risky
Editór : Ilima’a