Loluwari Média (Díli) – Deskonfia mane ida ho naran inisiál LM iha tentativa atu halo abuzu seksuál hasoru nia oan rasik ho idade tinan 15 iha aldeia Fomentu I suku Comoro postu Administrativu Dom Aleixo, Munisípiu Dili.
Tanba ne’e bainhira Komandante Munisípiu Díli (KMD), simu keisa iha dadersan ohin (13/04), Komisáriu Asistente Polísia Orlando Gomes, orienta ekipa kaptura kedas hodi lori ba eskuadra PNTL Dom Aleixo hodi halo investigasaun.
Maibé bainhira PNTL atu halo intevestigasaun ba LM iha sala VPU, LM halo barullu iha sala Unidade Pesoál Vulnerável (sigla-portugés VPU) ne’ebé tenta atu baku tan membru PNTL sira ne’ebé atu halo investigasaun ba nia.
“Tanba ne’e mak husi ita Eskuadra Dom Aleixo foti suspeitu iha Sala VPU komandu Díli nian hodi halo prosesu maibé depois de to’o iha sala VPU suspeitu halo barullu iha sala VPU baku ita nia membru VPU sira no estraga mós ita nia ekipamentus hanesan komputadór 2 no kadeira meza sira hotu tanba ita foti suspeitu para atu hatene kazu ida ne’e”dehan nia ba Jornalista Loluwari.tl iha nia kna’ar fatin Eskuadra Dom Aleixo, Aimutin Díli, Segunda (13/04).
Nia informa, Suspeitu refere membru sira lori nia mai VPU atu halo prosesu identifikasaun maibé suspeitu refere halo agresaun fiziku hasoru membru PNTL iha sala VPU no ikus nia ulun baku ba parede rahun tiha no suspeitu refere evakua ona ba HNGV hodi halo tratamentu ba nia kondisaun.
“Depois de halo tratamentu hotu ami sei lori fali mai para haree nia prosesu Indentifikasaun, ami sei bolu Doutór sira mai haree nia kondisaun moras ne’e mak hafoin ita kontinua ba nia kazu violasaun Abuzu Sexual ne’e ba nia oan rasik tanba ne’e mak ami lori mai iha Komandu halo indentifikasaun ba kazu refere”dehan nia.
Tanba ne’e kazu ne’e PNTL konsidera obstrusaun de Autoridade Seguransa no Violénsia Estragus ekipamentus komputadór iha sala VPU ne’ebé suspeitu refere PNTL konsidera hanesan kazu Fraglante de lito no sei detein oras 72 hafoin iha sela detensaun.
Jornalista : Cesar Pires
Editór : Herminio Cardoso