Loluwari Média (Díli) – Polísia Nasionál Timor-Leste (PNTL) kontinua buka tuir autór sira ne’ebé utiliza aplikasaun modus Snap Boost hodi bosok vítima sira iha sosiál media.
Diretór Diresaun Servisu Investigasaun Kriminál Nasionál (DSIKN), Superintendente Xefe Polísia, João Belo dos Reis hatete, Polísia kontinua akompaña modus operandu Snap Boost ne’ebé autór sira habosok sidadaun timoroan hetan lukru.
“Ami mós simu ona keixa husi vítima na’in rua ne’ebé sente ofendidu tanba ami buka hela maluk sira seluk ne’ebé sente lakon nia rikusoin hanesan osan bele mai halo keisa para ami buka tuir autor sira ne’e”dehan nia ba jornalista sira iha Komandu Jerál PNTL Kaikoli Díli, Tersa (14/04).
Tanba ne’e PNTL husu ba publiku liu-liu Inan-Aman sira iha Munisípiu ou Portu Administrativu, Suku no Aldeia sira katak labele fiar arbiru ba publikasaun ne’ebé laiha baze legál.
Nia informa,PNTL kontinua buka informasaun husi sidadaun sira ne’ebé sente sai vítima atu bele halo keisa tanba aplikasaun ne’e rasik la eziste iha play store.
“ami mós cek ona aplikasi ne’ebé mak Suspeitu sira utiliza ne’e la rejista iha Play Store siknifika aplikasi ne’e ilegál”dehan nia.
Tanba ne’e husu ba publiku atu kuidadu tanba iha tempu modernu aplikasi barak no lohi malu mós barak halo Vitima mós ba modus operandu ida ne’e.
Nia haktuir,Vitima sira kada ema ida hatama osan $ 20 dolar to’o $ 2000 dólares Americano ne’ebé PNTL sei buka tuir Vitima sira hotu.
“Ami sei mantein kontaktu ho Banku Nasionál tanba sira mak regulariza orsamentu sira sira ne’e,ami mós sei buka referensia ba nasaun seluk ne’ebé uza métodu hanesan ne’e karik bele justifika ba prosesu investigasaun ne’ebé agora dadaun lao hela”dehan nia.
Tanba vítima na’in rua mak halo keisa ona no espera katak vítima barak mak sei mai tan tanba lista ne’ebé Autoridade Seguransa hetan hamutuk Atus rua resin husi Munisípiu Postu administrativu, suku no Aldeia sira.
Jornalista : Cesar Pires
Editór : Herminio Cardoso