Loluwari Média (Díli) – Polísia Nasionál Timor-Leste (PNTL) liu-husi Unidade Polísia Marítima (UPM) relata preokupasaun modernizasaun servisu ba membru komisaun B ne’ebé trata asuntu negósiu estránjeiru defeza no seguransa iha Parlamentu Nasionál.
Komandante UPM Superintendente Xefe Polísia, Eugenio Pereira, hatete, UPM koloka asuntu ne’ebé pertenente no estratéjiku, liu-liu kona-ba iha atividade Marítima nian atu komisaun B bele tau konsiderasaun.
“Ohin UPM aprezenta informasaun no aprezentasaun sira kona-ba ami nia servisu ámbitu seguransa zona marítima, ami mós koloka kona-ba situasaun sira ne’ebé mak ita bele dehan iha ninia dezafius balun ne’ebé mak sempre difikulta” ba jornalista sira iha Komandu Unidade Polisia Maritima Lesidere Díli. Kuarta (15/04).
Nia informa, iha ezekusaun misaun ne’ebé mak pertenente ba iha Unidade Polísia Marítima nian, maibé UPM nafatin hatudu prontidaun katak, atividade sira ne’ebé mak hala’o ne’e sei la sai hanesan obstákulu ba iha UPM.
Nia dehan, UPM nafatin kontinua aprezenta ba deputadu sira atu sira bele haree kestaun balu ne’ebé mak karik pertenente ho kestaun polítika, sira sei rekomenda tuir sira nia kompeténsia hanesan orgaun fiskalizadór no mós orgaun lejisladór.
“Ami koloka kestaun rua(2) mais esensiál liu haree ba iha rekursu, tantu rekursu humanu no mós rekursu lojístika, tanba ita ko’alia kona-ba atividade operasaun ita presija ema”dehan nia.
Tanba ne’e UPM koloka kestaun sira ne’e no oinsá atu haree ba iha futuru liu-husi kompeténsia komandu jerál ka liu-husi kompeténsia ne’ebé mak mai husi orgaun lejisladór ka orgaun fiskalizadór sira atu bele solusiona situasaun sira ne’e hotu.
“Rekomendasaun ne’ebé ami aprezenta mak oinsá atu bele moderniza ami nia sistema servisu UPM nian intermus iha área vizilánsia nian, ka iha área kontrolu nian”dehan nia.
Ezemplu, Nia dehan, hanesan iha situasaun ne’ebé mak akompaña iha entidades sira ne’ebé mak pertenente ba iha kompeténsia iha vizilánsia iha país seluk, sira komesa halo moderniza ona sira nia sistema vizilánsia.
“ezemplu hanesan uza meius teknolójia bainhira atu halo vizilánsia iha área kosteira, ida ne’e ho ninia objetivu ida mós atu bele minimíza risku no mós minimíza kustu no mais eferivu liu atu bele kontrola ita nia zona kosteira”dehan nia.
Tanba ida ne’e UPM nia planu ida para futuru mai atu moderniza no UPM rekomenda para depois ida ne’e bele hetan mós apoiu, atu bele aprezenta ba komandu hodi enkamina ba governu atu deskute iha parlamentu bazeia ba orsamentu ne’ebé mak iha.
Prezidente komisaun B PN Domingos Augusto “Deker” hatete, komisaun B hakarak rona nafatin sira nia preokupasaun ne’ebé liga ba sira nia nesesidade, oinsá atu bele suporta sira iha kna’ar loro-loron nian.
“Ami halo rezumu katak, sira iha dunik difikuldade ne’ebé ami rezumu ba pontu rua(2), mak rekursu humanu no rekursu lojístika, komisaun B sei elabora fila-fali hodi hato’o ba iha ministériu kompetente no mós komandu PNTL atu bele koloka ba orsamentu jerál estadu ne’ebé sei hala’o iha planu orsamentu jerál estadu 2026 nian”dehan nia.
Jornalista Estajiada : Arcângela dos Santos
Editór : Herminio Cardoso