Loluwari Média (Díli) -Polísia Nasionál Timor-Leste (PNTL) liu-husi Komandu Munisípiu Díli asegura ona suspeitu na’in 5 ne’ebé baku estudante iha Areadores Universidade Nasionál da Paz (UNPAZ).
Komandante Munisípiu Díli (KMD), Komisáriu Assistente Polísia Orlando Gomes hatete,Bainhira kazu ida ne’e vitima mai hato’o keixa iha Eskuadra Dom Aleixo no ekipa patroliamentu ba kedas iha Areadores UNPAZ nian hodi halo koordenasaun ho seguransa UNPAZ nian ho Ofisiál Polísia Suku (OPS) hodi buka tuir suspeitu sira.
“Ikus ita hetan suspeitu sira nia paradeiru ita nia patroliamentu ba kedas iha suspeitu sira nia rezidénsia no ita halo kapturasaun ba suspeitu na’in”dehan nia ba Jornalista sira iha Eskuadra Dom Aleixo Aimutin Díli, Sesta (17/04).
Akontesimentu ne’e akontese iha loron 15 fulan Abril maizomenus oras haleu tuku 3 ho balun iha Areadores UNPAZ ne’ebé mak kuaze ema nain 10 baku lisuk vítima estudante mane ida ne’ebé viral iha Media sosiál.
No iha momentu ne’eba suspeitu sira halai ses tiha husi fatin akontesimentu maibé Polísia kontinua buka tuir no konsege kaptura autór sira.
Suspeitu na’in 5 ne’ebé Polísia kaptura mak hanesan ho nia naran inisiál RS, HJM, WSS, ERS no JST ne’ebé Polísia lori ba Eskuadra Dom Aleixo hodi halo indentifikasaun ba suspeitu sira.
Bainhira halo indentifikasaun ba suspeitu nain 5 husi Vitima mós mai hato katak Vitima halo ona keixa iha PCIC tanba ne’e horseik suspeitu nain 5 Eskuadra Dom Aleixo entrega ba PCIC hodi halo prosesu ba oin.
Nia informa, aktus sira hanesan ne’e krime agresaun fíziku hasoru vítima tanba ne’e PNTL husu ba estudante UNPAZ, eskola ne’e fatin ba ema hotu-hotu atu bele ba estuda no aprende.
“Maibé dala-ruma ita nia estudante sira sempre lori problema iha liur lori ba iha fatin buka matenek nian”dehan nia.
Tanba ne’e Komandu Munisípiu Díli apela ba estudante no joven sira iha kapitál liu-liu ba buka matenek iha UNPAZ labele lori problema partikular sira ne’ebé mak iha li’ur lori to’o iha fatin universitáriu.
Tanba Motivu husi akontesimentu ne’e problema partikular iha uma, liga ba estudante iha UNPAZ bainhira estudante ne’e atu sai ba liur hodi foto Copy nia dokumentus eskola nian.
Maibé to’o portaun suspeitu ida ho inisiál HJM mak husu ba estudante vítima dehan “o mete hotu ka” husi lia-fuan ida ne’e mak sira dunik tuir vítima ne’e hodi baku lisuk hodi hetan kanek iha parte tilun, ibun ran, liman sikun hetan kanek.
Tanba ne’e kazu prosesu lori ona Ministériu Públiku hodi tuir prosesu krime lei ne’ebé mak iha.
Jornalista : Cesar Pires
Editór : Herminio Cardoso