Loluwari Média (Díli) – Ministru Defeza, (MD), Kontra Almirante, Donanciano Costa Gomes “Pedro Klamar Fuik” entrega karreta Tátika-10 ba Forsa Defeza Timor-Leste (F-FDTL), simu direta husi Xefe Estadu Maiór Jenerál F-FDTL, Tenente Jenerál, Domingos Raul, “Falur Rate Laek” karreta Tátika-10 ne’e sosa husi Xina ho orsamentu hamutuk rihun 60 dolar amerikanu, ho orsamentu jerál Estadu 2024.
“Ohin ita ofisialmente entrega karreta 10 ho marka BAIC ne’ebé mak hola parte husi orsamentu jerál estadu (OJE) 2024 nian, viatura 10 ne’e, nu’udar viatura militár ne’ebé mak ita klasifika nu’udar viatura tátika de uzu administrativu.” Dehan Ministru Defeza, (MD), Kontra Almirante, Donanciano Costa Gomes “Pedro Klamar Fuik” ba jornalista sira, iha kuartel General Fatuhada, Dili, kuarta (11/12).
Klamar Fuik hatete, viatura sira ne’e Komandante kompañia, Komandante peletaun sira, utiliza iha térrenu hodi kontrola membru forsa sira nia progresaun alende ne’e uza mos ba administrativu militár.
“Ita iha hanoin atu bele uniformiza ita nia militár sira, ho viatura ne’ebé mak karakteristika militár, atu ita bele hetan sira nia aprezentasaun nu’udar militár. Tanba ita nia dezenvolvimentu tinan 20 ne’e, ita hotu hatene sira uza karreta barak ho tipu oioin, maibé ita hanoin tempu ona iha Nonu Governu Konstitusionál iha empeñamentu atu bele halo transformasaun ba militár sira nia ekipamentu, material, liliu atu bele alkansa objetivu modernizasaun forsa.” Governante ne’e afirma.
Exekutivu ne’e esplika, viatura 10 ne’e, alta téknolojia, no viatura refere nu’udar mós viatura tátika militár sira seluk ne’ebé mak iha kondisaun atu kumpre misaun.
“Ita hatene katak, ida ne’e viatura tátika uzu administrativa la’ós ba kombate. manutensaun sei halo hanesan baibain, ida ne’ebé mak bolu klasifika primeiru, segundu no terseiru ne’e hanesan, bele truka oli no bele mós truka filter prosesu halo normal, ne’ebé mak akontese. Mas iha garantia ba tinan 2.
“Manutensaun ne’e pakote ida, kuandu ita halo manutensaun, nia orsamentu ba akizasaun meius militár ba karreta ka ró, ita tenke tau kedas ona orsamentu ba iha manutensaun ne’ebé bolu orsamentu sustentasaun.”
Xefe Estadu Maiór, Jenerál F-FDTL, Tenente Jenerál, Domingos Raul “Falur Rate Laek”, agradese tanba governu, liuhusi Ministériu Defeza, investe no dezenvole forsa nia material ho ekipamentu militár ba professional no modernizasaun.
“Ita ko’alia kona-ba, profesionalizasaun tenke meius, iha aset ekipamentu, buat hotu disponivel para ita haree militár sira professional. Ita dehan moderniza tenke iha regulamentu propriu hanesan lei hodi regula. Nune’e mós karreta 10 ne’e tenke iha ninia regra uzu, velosidade máximu hira, ninia operasionalidade, manutensaun eskalaun 1-2 saida mak sei halo, hodi prevene.”
Tu’ir planu karreta Tátika-10 ne’e, komandu sei distribui espesiál ba komandante operasaun, hodi halo servisu iha terrenu.
Jornalista : Chay Risky