Loluwari Média (Hera) – Komandante Komponente Naval Comodoro, Higino das Neves, hatete, hahu kopa Navál ho ksolok ohin ensera mos ho ksolok.
“Ha’u husu ba Clubu 17 ne’ebé durante hahu jogu ho ksolok ohin ita ensera ho ksolok tanba durante ita hahu, ita nia Kopa Navál la’o diak tebes tu’ir ida-idak nia tatiku no abilidade ne’ebé hatudu iha kampu ohin rejultadu klubu rua mak tama final, ha’u espera katak klubu 2 ne’e sei hatudu jogu ne’ebé diak.” Dehan Komandante Komponente Naval Comodoro, Higino das Neves, ba jornalista sira iha kampu Futeból Hera, Dili, segunda (24/02).
Neves hatete, klubu 2 ne’ebé lansa kontra atake malu, kontinua nafatin hatudu sira nia disiplina, bainhira iha buat ruma so arbitragen mak iha direitu atu foti desizaun.
“Ha’u husu ba klubu 2 atu mantein jogu ho disipliña tu’ir ida-idak nia tatiku ne’ebé iha. Ha’u husu mos ba adeptus husi klubu 2 atu hatudu imi nia disipliña to’o jogu ne’e termina ho ksolok.”
Komandante Komponente Naval fo nia desezu no parabéns ba klubu 2 ne’ebé joga iha etape finais liuhusi esforsu lubuk ida molok hakat to’o faze ida ohin tanba ne’e hatudu imi nia jogu ne’ebé diak.
“Ha’u agradese ba juventude Hera Autoridade Lokál Hera, Dekanu Politeknu Universidade Nasionál Timor Lorosa’e (UNTL) Hera, Komandante Polísia Nasionál Timor-Leste (PNTL) Hera no mós komunidade hotu-hotu nia suporta maximu mai iha Kopa Navál ida ne’e ohin ita termina ho susesu.”
Prezidente Komisaun Kopa Naval, Capitaun Tanente, Rosario Alves da Cruz, hatete, enseramentu Kopa Navál nu’udar tradisaun iha Komponente Navál ne’ebé kada tinan sempre realiza.
“Kopa Navál sai mós simbolu relasionamentu entre Forsa Armada no komunidade liliu talentu juventude sira iha Futeból, atu kria paz no estabilidade iha komunidade nia le’et.”
Kopa Navál hetan suporta maximu husi Kompaña Heineken, Timor Telekom, Karvar Unipesoal.Lda, DSP Australia inklui Dekanu Politeknu UNTL Hera.
Treinador FC Laivai, Jenito da Costa Guterres, hatete, maske nia ekipa partisipa Kopa Navál final dala rua seidauk konkista vitoria.
“Ami FC Laivai ladun satisfas ho desizaun ne’ebé arbitragen foti tanba parte ida rua falta ne’ebé merese arbitragen la hu, no falta ida ne’ebé la merese nia hu fali, maibé ohin ekipa rua halo kontra atake malu ho ida-idak nia tatiku iha kampu la’o diak tebes maske ami derota maibé ami kontente.”
“Ohin jogu la’o diak tebes maibé fallansu husi ami nia jogadór, ami la konsege ultra pasa maibé ami derota hodi sai 2 lugar. Maibé ida ne’e mak realidade jogu, ami prontu simu no ami sei esforsu hodi hadia eru ne’ebé mak ami iha no ba tinan oin.”
Treinador ekipa FC Umbafo, Gaspar Amaral, hatete, iha primeira parte ekipa adversariu FC Laivai halo golu 2-1 tanba fallansu husi Defeza karuk, hodi rejulta FC Unbafo derota iha primeiru parte.
“Segunda parte ha’u halo mudansa jogu iha kampu ha’u dada sai Defeza karuk hodi truka no halo jogu ne’e diak loos no ami konsege hetan Vitoria ho rejultadu 3-2. Ami sente kontente tebes ho rejultadu ida ne’e no ami prontu kompete ba tinan oin iha Kopa Navál.”
Jornalista : Chay Risky