Loluwari Média (Díli) – Adjuntu Delegasaun International Committee of the Red Cross (ICRC) Indonesia ba Timor-Leste, Johan Guillaume, no Xefe Estadu Maiór Jenerál Forsa Defeza Timor-Leste (F-FDTL), Tanente Jenerál, Domingos Raul “Falur Rate Laek” selebra akordu kooperasaun nunne’e hetan formasaun ba membru F-FDTL iha area lei humanitaria internasional hodi eleva kuñesimentu ba membru F-FDTL atu fo asistensia ba sidadaun sira iha kualker situasaun normal no funu.
“Objetivu MoU ne’e atu kontinua de’it extensaun servisu ne’ebé mak ita halo hamutuk ho F-FDTL atu hasa’e kuñesimentu liuhusi formasaun sira ba iha lei humanitariu internasional, bainhira iha tempu konflitu nia laran, ida ne’e importante tebes parte rua nia kolaborasaun nu’udar opurtunidade atu hasa’e sira nia kuñesimentu.” Dehan Adjuntu Delegasaun International Committee of the Red Cross (ICRC) Indonesia ba Timor-Leste, Johan Guillaume, ba jornalista sira, iha kuartel jeneral F-FDTL, Fatuhada, Dili, kuarta (26/02).
Nia hatete, akordu kooperasaun ne’e liliu formasaun ba membru F-FDTL sira, liuhusi eventu seminariu no workshop sira ba lei humanitaria internasional.
“Kruz Vermalla Internasional nia komitementu atu halo parseria no servisu hamutuk ho F-FDTL liliu ba area ne’ebé temi ona lei humanitaria internasional nian.”
Lori ICRC nian naran kongratula Kruz Vermella Timor-Leste (CVTL), tanba durante ne’e CVTL sai ona parseiru ba ICRC hodi halo servisu fo asistensia humanitaria ba komunidade iha Timor-Leste.
“Ami hakarak hato’o ami nia obrigadu wa’in ba CVTL ne’ebé mak reprezenta husi señor Luis ne’ebé mak iha, ami nia parseria importante ida iha Timor-Leste ne’ebé mak servisu hamutuk durante iha tempu dame nia laran no mos iha tempu emerjensia nia laran. Ami haree Kruz Vermella Timor-Leste sai hanesan parseiria ida importante ida ba Timor-Leste.”
Xefe Estadu Maiór Jenerál Forsa Defeza Timor-Leste (F-FDTL) Tenente Jenerál, Domingos Raul “Falur Rate Laek” dehan memorandu ida ne’e simboliza kooperasaun ho forsa defeza atu prepara forsa sira ho formasaun kona-ba vizaun humanismu ka humanitaria no direitus humanus.
“Militar sira bainhira ba halo asaun ruma sempre violasaun direitus humanus barak, ida uluk iha funu, funu ba libertasaun nasional arma kombate mak direitu humanus.”
“Ita nia relasaun ho forsa defeza ou falintil no Kruz Vermella Intenasional ne’e la’os foin hahu ne’e maibé hahu kedas iha tempu difisil nia laran.
Sira asumi importante ba libertasaun nasional.Tanba sira fo apoiu humanitaria fo mos dadus no informasaun ne’ebé violasaun direitus humanus ba iha mundu tomak publika internasional halo realiza referensia ba ita.”
Jornalista : Chay Risky