Loluwari média (Díli) – Komandante Jerál Polísia Nasionál Timor-Leste (PNTL), Komisariu Jerál, Henrique da Costa hatete, taxa rotativa ba Komemorasaun aniversariu PNTL ba dala 25 atu hametin estabilidade seguransa iha Timor-Leste ho tema “hamutuk ita hametin konfiansa” hodi servisu hamutuk ho PNTL komunidade no juventude sira.
“Atividade ba komemorasaun aniversariu PNTL ba dala rua nulu resin lima (25), ho tema ba tinan ida ne’e mak “hamutuk ita hametin konfiansa” polísia mesak sei la halo buat ida maibé polísia ho ita bo’ot sira servisu hamutuk ita bele hametin konfiansa tantu polísia ho alin sira polísia ho komunidade polísia ho ema hotu.” Dehan Komandante Jerál PNTL, Komisariu Jerál, Henrique da Costa, ba jornalista sira, iha salaun Bebora, segunda (10/03).
Superior ne’e hatete, taxa rotativa ba jogu futeból salaun (futsal) ida ne’e nia objetivu atu hametin amizade entre joven sira ho PNTL, atu promove juventude nia talentu liuhusi desportu.
“Atividade ida ne’e ita realiza la’ós atu promove de’it talentu husi alin sira nian, maibé mós iha intensaun atu hametin lasu amizade entre joven sira husi Eskola ida ba eskola seluk nune’e halo alin sira kuñese malu bele aplika alin sira nia talentu liuhusi joga futsal.”
Atividade jogu futsal ne’e foin primeira vez PNTL realiza entre eskola sekundariu iha munisípiu Dili. Tanba tinan-tinan federasaun futeból Timor-Leste (FFTL) liuhusi asosiasaun futsal Timor-Leste ne’ebé sempre partisipa iha eventu nasionál no internasional, tanba ne’e PNTL halo eventu ba jogu futsal ba ensinu sekundariu sira hodi hatudu talentu ne’ebé diak nune’e sira bele iha abilidade (skill) hodi tama selesaun nasionál Timor-Leste.
“Atividade futsal ba eskola sekundariu ne’e foin mak primeira vez ita realiza ita hatene katak tinan tinan federasaun futebol timor leste (FFTL) liuhusi asosiasaun futsal Timor-Leste (AFTL) sempre partisipa iha eventu nasionál no internasional sira, maibé ita difisil tebes atu hetan jogador sira diak, entaun liuhusi atividade ida ne’e ita hakarak husu ba alin sira hatudu sira nia talentu liuhusi futeból salaun nune’e se mak hatene ba futuru bele priense rekezitus federasaun nune’e bele tama iha selesaun nasionál”.
Primeiru Ministru (PM), Kay Rala Xanana Gusmão, hatete, Polisia Nasional Timor-Leste (PNTL) assume misaun bo’ot atu fo Seguransa ba povu Timor Leste. Tanba ne’e ho jogu amizade ne’e hatudu sira nia abilidade no talentu no labele tama iha arte marsiais hodi tuku malu no tebe malu.
“PNTL iha misaun bo’ot ida atu fo seguransa ba povu tomak, maibé ikus-ikus ne’e tanba desportu laiha joven sira tama fali ba Arte marsiais la’os arte marsial ne’e oho malu fali baku malu fali estrada malu fali, tanba ne’e maka governu ida ne’e hapara tiha sira hodi ita hetan hakmatek ituan.”
Xefe governu agradese ba PNTL tanba hanoin joven sira, tanba joven mak futuru ba nasaun Timor-Leste, tanba ne’e liuhusi jogu amizade ne’e hodi kria paz estabilidade no harmonia iha Timor-Leste.
“Ha’u nia agradese no apresia teb-tebes ba PNTL, bele hanoin to’o imi, tanba imi agora sei joven. Imi maka sei sai futuru nasaun ne’e nian, se ohin loron ita la kria amizade ba malu la kria konfiansa ba malu la kria harmonia entre imi joven sira ita baku malu hela deit rai ida ne’e sai Republika Demokratika baku malu de’it.”
Kompetisaun ida ne’e nu’udar opurtunidade ida hodi ida-idak esforsu ba eventu jogu futsal ne’e no hatudu talentu ne’ebé diak liu husi kompetisaun ne’e.
“Mai iha kompetisaun ida ne’e la’os atu buka manan, ita tuku malu tebe malu tenke manan la’e, kompetisaun ida ne’e opurtunidade ida atu ita aprende mos joga bola nune’e tama hodi dezenvolve imi nia talentu no imi kuñese malu hodi kria amizade entre eskola ida ba eskola seluk.”
Ne’e duni ba liga futsal ida ne’e hodi fo apresiasaun ba Polisia Nasional Timor-Leste nia servisu tanba sira mak fo seguransa ba territoriu Timor laran tomak, nune’e joven hatudu talentu ne’ebé diak hatudu jogu ne’ebé diak.
Partisipa abertura futsal husi Eskola Sekundaria 16 iha munisipiu Dili, kompostu husi Eskola Teknika Informatika (ETI) Dili, Eskola Sekundaria Katolika São José Externato, Eskola Sekundaria Colegio São Miguel Arcanjo, Eskola Sekundaria Geral Privadu Nicolau Lobato, Eskola Sekundaria Katolika Santa Madalena Canosa, Eskola Sekundaria Geral Publika 4 Setembru, Eskola Sekundaria Privadu Kafe Dili, eskola sekundaria geral Cristal, eskola sekundaria ST J Thaddeus, eskola sekundaria Novel da Paz, eskola sekundaria geral publika 12 de Novembru, eskola sekundaria geral publika 10 de Dezembru, eskola sekundaria katolika São Pedro, eskola sekundaria katolika São José Operariu, eskola sekundaria privadu Annur, eskola sekundaria geral publika 5 De Maio no eskola sekundaria katolika São Carlos.
Jornalista : Anis