Loluwari Média (Dili) – Prezidente Repúblika (PR), José Ramos-Horta, husu Polísia Nasionál Timor-Leste (PNTL) atu sai seguransa ida ne’ebé diak no profisional ba Povu Timor-Leste.
“Ha’u husu ba Instituisaun Polísia Nasionál Timor-Leste ne’ebé existe tinan 25 ona atu sai nafatin seguransa ne’ebé diak ba ita nia povu no ba ita nia rai doben Timor-Leste.” Dehan Prezidente Repúblika (PR), José Ramos-Horta, ba jornalista sira, iha Centru Formasaun Polisia (CFP) Comoro, Dili, tersa (11/03).
Xefe Estadu hatete, iha nasaun ida sempre iha Autoridade seguransa, tanba ne’e mak PNTL atu fo seguransa ba povu doben Timor-Leste ho diak ba futuru.
“Ha’u husu ba imi, imi nia misaun nu’udar forsa ida sivika tanba ne’e mak tau matan ba problema violensia domestika no tau matan ba familia ne’ebé laiha forsa no mane sempre abandona nia oan ho nia fen tanba situasaun no problema ne’e akontese dala barak ona.”
“Polísia sempre salva ema ne’ebé laiha forsa aumenta imi nia programa prezensa iha sosiadade nia leet liliu iha aldeia no suku, no husu Governu liliu Ministru Interiór atu tau osan ba programa sira ne’e.
“Ita hotu hatene Timor-Leste nu’udar país demokratiku iha mundu. Tanba ne’e mak ita nia seguransa ne’e importante tebes liliu atu kontrola problema organizadu sira no mos ba droga sira ne’ebé ohin loron seidauk eziste maibé nu’udar seguransa antisipa kedas.”
Komadante Jerál PNTL, Komisariu Jerál, Henrique da Costa, hatete, Polísia sempre tau nia preokupasaun hodi afirma ba Timor-Leste, nu’udar nasaun ida ne’ebé seguru atu kria paz no estabilidade entre ema no propriedade sira.
“Aniversáriu PNTL ba dala 25 ho tema “Hamutuk ita hametin konfiansa” atu servi ita nia rai hanesan insentivu ida ita hotu nia servisu nu’udár futuru Instrusaun PNTL nian tanba ne’e mak tau importansia ba ita hotu nia kontribuisaun.”
Atu hametin populasaun nia konfiansa mai PNTL nu’udar tinan 25 polísia nu’udár ajente estadu garantia legalidade demokratiku no seguransa ba ema no propriedade sira no polísia sempre proteze sidadaun sira nia direitu.
“Maske ami hasoru dezafiu barak maibé ami ho espiritu misaun no unidade husi ita nia membru PNTL sira nia apoiu ne’ebé la ho kondisaun ne’ebé atu hametin konfiansa husi ita nia populasaun.”
“Durante existensia PNTL tinan 25 membru polísia feto no mane sira sai determinante ba susesu sira ne’ebé halo ona no mantein seguransa interna hodi povu hakmatek no kumpri misaun sira maske PNTL hasoru difikuldade balu ne’ebé mak seriu tebes. Maibé polísia sempre hatudu nia forsa unidade no konfiansa no mos esperansa ba futuru ne’ebé seguru ba povu Timor-Leste.”
“Hamutuk hametin konfiansa ne’e prinsípiu fundamental ne’ebé tenke orienta ita atu bele alkansa buat ne’ebé simples ba iha buat ne’ebé komplexu.”
Jornalista : Chay Risky