Loluwari Média (Díli) – Sarani Timor-Leste konsidera legadu Bispu na’in tolu (3) Dom Jaime Garcia Goulart, Dom José da Costa Alves no Monsiñor Martinho da Costa Lopes, nu’udar patrimóniu espiritual no nasional ne’ebé la bele haluha. Sira nia sakrifísiu no servisu Bispu na’in tolu ba Igreja Katólika no luta Timor-Leste ba ukun-rasik an tenke sai ezemplu ba jerasaun ohin atu hametin unidade, no pás.Legadu ne’ebé La Maran Ba sarani sira, Bispu na’in tolu ne’e la’ós de’it bibi atan.
Sira hatudu sakrifisiu boot ba rai no ba luta Timor-Leste ba ukun rasik an, no mós ba moris espiritual povu.
Maria Isabel da Costa Pinto nu’udar sarani hatete, legadu Bispu na’in tolu nian boot tebes ba Timor-Leste.
“Bispu na’in tolu nia legadu ba Timor-Leste boot tebes, tanba sira nia sakrifisiu iha signifikadu boot tebes. Ida ne’e la’ós de’it ba ha’u, maibé ba povu Timor-Leste tomak. Maske sira na’i lulik, servisu ba Igreja no ba Timor-Leste nia libertasaun,” nia dehan ba Jornalista sira iha Aeroportu Internasionál Nicolau Lobato, Comoro, Tersa (01/09).
Maria Isabel sente orgullu tanba Governu Timor-Leste konsege lori fila urnas bibi Atan na’in tolu mai Timor-Leste hodi fó onra ba sira nia sakrifisiu ba independensia Timor-Leste.
“Ami orgullu tebes ba ita nia Governu ne’ebé bele lori hikas urna na’in tolu mai. Tanba Dom Jaime Garcia Goulart nu’udar bispu dahuluk iha Timor,” nia dehan
Aleinde ne’e, sira sakrifika an ba rai Timor. Nune’e mós Dom José, nia mós hanesan bispu Timor nian, no Monsiñor Martinho. Sira hatudu ona buat barak ba Timor-Leste,
Xamada ba Partisipasaun no Pas Iha biban hanesan, sarani Agostinho Veira dehan Bispu na’in tolu nu’udar lider Igreja Katólika Timor-Leste ne’ebé fó kontribuisaun maka’as ba nasaun.
“Husu ba sarani sira atu partisipa ho máximu iha eventu ida ne’e to’o remata no to’o halot iha fatin ikus. Nune’e ita fó onra ba sira nia sakrifisiu ba Timor-Leste nia luta,” nia afirma
Enkuantu sarani, Arminda dos Reis, hatudu nia entuziasmu hodi partisipa iha simu urna Bispu na’in tolu. Nia iha memoria pesoal ho Monsiñor Martinho.
“Amu Bispu Dom Martinho uluk ba ha’u nia rai no bele fó sakramentu Krisma mai ha’u iha Lospalos, Tutuala,” nia lembra.
Nia mós subliña sakrifisiu Monsiñor Martinho nian ba Timor-Leste. “Iha momentu nia ba Tutuala, hasoru mós atual Primeiru Ministru Kay Rala Xanana Gusmão. Nu’udar bibi-atan ida, nia hatutan tan nia sakrifisiu hotu ba Timor-Leste,” nia haktuir.
Arminda husu ba ema hotu atu banati tuir legadu Bispu na’in tolu nian hodi kria pás no estabilidade.
“Ita hanoin amu bispu na’in tolu nia hanoin: oinsá ita dame malu no hamutuk malu, hanesan sira halo ba ita,”
Jornalista : Ercia Freitas
Editor : Hermínio Cardoso