Loluwari Média (Díli) – Xefe Bankada Partidu Kmanek Haburas Unidade Nasionál Timor Oan (P KHUNTO), António Verdial de Sousa, levanta assuntu ne’e iha parlamentu nasional durante plenaria tersa-feira ne’e.
Nia dehan, infra-estruturas nu’udar pilar importante ida, iha dezenvolvimetu nasional tanba estrada mak fasilita atividades ekonómikas, movimentasaun sosial sira, inklui transportes.
“Bankada Khunto husu preokupasaun komunidade sira husi Suku haat, Sereleu, Baduru, Maina 2, Maina 1 iha postu administrativu Lautem, munisipiu Lautém, kuñesidu hó naran “Zona Alto Laleno” ne’ebé uluk tempu rezisténsia sai mós hanesan fatin ida ba Komandante em Chefe das FALINTIL Maun Bo’ot Kay Rala Xanana Gusmão, hodi helik bà no fatin ne’e naran “Lua Pala” no fatin ne’e uluk sai baze ba funu na’in sira, nune’e ami husu atu IX governu Kostitusional tau matan.”
Estrada husi suku Serelau, liga ba Suku 3 seluk ne’ebé kondisaun grave tebes, iha tempu udan, kareta ho motor susar halo movimentasaun no difikulta tebes komunidade ne’ebé asesu ba estrada refere.
“Estrada a’at laós novidades foun ba povu tomak, ita rekuñese Ministériu Obras Públikas, hadía ona estradas iha nível Nasional espesial Bairo-bairo iha kapital Dili laran, munisípiu, postu administrativu no suku balu no kuaze iha fatin barak mak sei grave hela.” Dehan Xefe Bankada Partidu Kmanek Haburas Unidade Nasionál Timor Oan (P.KHUNTO), António Verdial de Sousa, iha nia intervensaun politika iha uma fukun Parlamentu Nasional, segunda (13/01).
“Informasaun ne’ebé Bankada Khunto simu husi terenu, autoridades suku ha’at submete ona proposta ba Ministério das Obras Públikas iha VIII governu nia mandatu no iha altura ne’eba konsege loke konkursu públiku ba Konsultan Sira no Kompañia ida hanaran “”DETILE KONSULTAN Lda”, mak sai manan na’in no halo ona levantamentu dadus.
Hafoin IX governu hola pose, autoridades lokal sira kontinua submete fila-fali proposta refere ba gabinete Primeru Ministro, maibe nafatin iha inserteza nia laran. Biban ida ne’e Bankada Khunto husu IX governu Konstitusional hodi tau matan ba estrada refere nune’e ita bele hatan ba ezijénsia povu.”
Bankada Khunto mós preokupa tebes hó projetu emerzénsia sira ne’ebé la’o tarde, nune’e prejudika komunidade no movimentasaun transportes. Tempu emerzénsia signifika, nesesidade urjente no presija hatan lalais nune’e bele fasilita movimentasaun hodi antisipa mós risku bo’ot seluk ne’ebé sei mai, maibé infelizmente projetu emerzénsia balu, han tempu naruk to’o fulan 5 ka 6 mak foin kontinua.
“Ami hakarak hatene ninia kauza será ke burokrasia mak naruk liu ka inkapasidade iha termus finanseiru no material husi kompañia? Ami, sujere ba Ministério Obras Públikas hodi haree no hadia uluk estrada sira iha teritóriu nasional, munisípiu to’o aldeia sira ne’ebé, ninia kondisaun grave no ninia benefísiu direta ba populasaun barak no husu atu labele haree liu ema ne’ebé kaer obra.”
Jornalista : Chay Risky