Loluwari Média (Díli) – Prezidente Institutu Nasionál Kombate HIV/SIDA (INCSIDA), Daniel Marçal, ho nia komitiva la para halo sensibilizasaun ne’ebé to’o ona iha partidu polítiku sira ne’ebé prepara jovens sira sai lideransa iha futuru.
Maibé atu sai lideransa ida ne’ebé di’ak tenke mós iha saúde ne’ebé di’ak liu-liu moras ida ne’ebé ho naran HIV-SIDA atu tenke prevene aan saúde.
Tanba Inisiativa ne’e nu’udar pasu estratéjiku atu transforma juventude partidu sira sai ajente transformadór ne’ebé iha koñesimentu kle’an hodi habelar informasaun prevensaun nian ba komunidade tomak hodi kombate moras ne’e.
“Ita tenke halo sensibilizasaun ne’e ba partidu polítiku sira,juventude sira ne’ebé iha partidu polítiku laran ne’e importante tebes tan ne’e, ita tenke fasilita hodi prepara sira sai lider ne’ebé saudável iha parte saúde no mós morál, atu bele ukun rai ida-ne’e ho di’ak.” Dehan Prezidente Institutu Nasionál Kombate HIV/SIDA (INCSIDA), Daniel Marçal ba jornalista sira iha pantai Kelapa dili, kinta (16/04).
Tan ne’e,sira presiza iha saúde ne’ebé di’ak hodi bele estuda no aprende ho di’ak, se sira nia saúde la di’ak, ne’e sei fó difikuldade ba sira atu aprende iha tempu joven no ikus mai partidu polítiku sira sei lakon lideransa barak iha futuru tanba HIV la hili ema ne’e lider ka la’e.
Nia haktuir, INCSIDA rejista ona kazu balu, maibé kazu sira-ne’e sei entrega ba Ministériu Saúde hodi halo jestaun,molok fó fali mai INCSIDA atu foti fali ba públiku tanba dadus 2025 nian iha ona.
Tan ne’e INCSIDA halo sensebelizasaun ba iha Partidu polítiku hahú husi PD ho nia membru hamutuk na’in 400 inklui estudante no profesionál saúde sira ne’ebé involve aan iha patidu laran.
Iha sorin seluk, reprezentante juventude husi Partidu Demokrátiku, Paulo de Jesus, hatete, Hanesan juventude PD sente orgullu tanba bele hetan informasaun husi INCSIDA oinsa atu kombate HIV-SIDA iha TL.
“Ha’u sente orgullu tebes tanba ohin bele hetan informasaun ne’ebé di’ak kona-ba oinsá ita hamutuk hodi kombate moras HIV/SIDA ne’ebé daudaun ne’e espalla maka’as iha ita-nia rai”dehan nia.
Nia haktuir, tanba Juventude mak ajente transformadór iha sosiedade,ne’ebé presiza dunik hatene informasaun ne’ebé kle’an no di’ak atu bele transmite fali ba komunidade no sosiedade tomak.
Sensibilizasaun ne’e hetan partisipasaun husi membru PD balu husi Munisípiu, estudante sira ne’ebé hola parte iha Movimentu Profesionál Saúde Demokrátiku, Juventude Feto Demokrátiku, no mós husi Sentru Formasaun “La Sama”.
Iha sorin seluk Presidente interino Partidu demokratiku (PD) Samuel Mendonça hatete, PD servisu hamutuk INCSIDA halo sensebeliza moras HIV-SIDA tanba tempu ona Juventude sira kombate aan.
“Jerasaun foinsa’e sira iha partidu demokratiku tenki sensibiliza ida-idak nia an hodi kombate katak HIV/SIDA ne’e mak moras ida pandemia ida ne’ebe mak tenki hakribi”dehan nia.
Entretantu Sensibilizasaun kona-ba moras HIV/SIDA hala’o iha Partidu Demokrátiku (PD),no sei kontinua ba Partidu KHUNTO FRETILIN, CNRT, PLP, no seluk tan.
Jornalista Estajiada : Quintão dos Santos Tilman/Dulce Magalhães
Editór : Herminio Cardoso