Loluwari Média (Díli) – Instituisaun Nasional Kombate HIV-SIDA (INCSIDA) nia sensibilizasaun iha fatin hotu-hotu tantu husi kapitál to’o área rural hodi partilla moras HIV-SIDA ba komunidade sira hotu.
Tanba Dezaminasaun sira ne’ebé INCSIDA halo la haree ba relijiaun ida ne’ebé tanba moras ne’e presiza tenke halo tratamentu laos de’it halo orasaun tuir ida-idak nia fiar.
Tanba ne’e Prezidente INCSIDA Daniel Marçal Kontinua halo Sensibilizasaun informasaun HIV-SIDA ba juventude sira husi Igreja Evanjélika Presbiteriania Asembleia de Deus Timor-Leste atu labele depende de’it ba iha orasaun maibè presiza mós atu halo tratamentu saúde.
“Dala ruma juventude igreja sira nian ne’e ita preokupa liu tanba sira dependente liu ho orasaun maibé sira nia esforsu laiha tiha, tanba ne’e ita atu halo prevensaun ba HIV-SIDA la’os de’it ho orasaun maibe presija esforsu mós tanba agora joven barak, joven igreja barak mak agora afeita ho HIV-SIDA, la’os hotu-hotu balu komprende balu lá komprende”dehan nia ba jornalista sira iha salaun INCSIDA Bebonuk, kuarta (14/04).
Nia haktuir, ba juventude igreza evanjelika Asembleia de Deus, bele halo orasaun maibé tenke esforsu no buka hatene mós kona-ba moras HIV-SIDA tanba Joven sira mai husi institutu mai husi igreja sira mós iha papel teb-tebes kontribui ba dezenvolvimentu nasionál.
“ne’e ita labele halo orasaun de’it ita reza ita halo orasaun maibé ita mós esforsu saida mak ita atu halo ba dezenvolvimentu ne’e iha parte ida oinsa ita atu proteze ema igreja nian husi problema HIV-SIDA” dehan nia.
Pastór Igreja Evangélica Presbiteriana Timor-Leste, Carlos Marçal, hatete, igreja hanorin de’it biblia ba joven no sarani sira atu moris tuir nu’udar ema fiar nain maibé informasaun kona-ba moras HIV-SIDA ne’e laiha.
“Maibé igreja dalaruma limitadu tebes atu fó formasaun konaba HIV/SIDA tanba iha de’it ninia membru sira ka ema ne’ebé ba igreja de’it”dehan nia.
Nia haktuir, parte igreja presiza kolabora hamutuk ho Governu no INCSIDA atu bele servisu hamutuk tanba igreja halo ministériu ne’e limitadu tebes atu fó sai programa ne’e ba ema hotu.
“Tanba ne’e, atividade semináriu sira hanesan ne’e importante tebes hodi hanorin no fó koñesimentu ba joven sira no ba ema hotu, tanba ema barak mak mate ona ho moras ne’e” dehan nia
Enkuantu Xefe Juventude Igreja Evangélica Assembleia de Deus, José Gonsalves Barreto reprezenta juventude agradese ba INCSIDA tanba bele fahe fomasaun sensibilizasaun moras HIV-SIDA ba sira.
“Nu’udar lideransa, asaun primeiru ne’ebé tenke prepara ba joven sira mak fó formasaun sira hanesan ne’e, la’ós de’it husi parte fíziku maibé mós espíritual nian”dehan nia.
Jornalista Estajiariu : Quintão dos Santos Tilman/ Dulce Magalhães.
Editor : Herminio Cardoso