Loluwari media (Díli) – Lider Máximu Partidu Kmanek Haburas Unidade Nasionál Timor Oan (KHUNTO), José dos Santos “Naimori Bucar” husu Governu atu aloka orsamentu ho montante boot ba Institutu Nasionál HIV-SIDA Institutu Públiku (INSIDA.IP) atu bele kombate moras HIV-SIDA iha Timor-Leste.
Naimori agradese ba INCSIDA ne’ebé mak halo programa dezaminasaun ne’e ba ema timoroan tomak atu presija hotu-hotu tenki partisipa atu bele kuidadu saúde ne’ebe di’ak liu-liu ba joven sira.
“Maibé husi ha’u rasik ezije nafatin estadu tenke tau osan bo’ot ba INCSIDA para sira bele kontrola ba munisípiu hotu-hotu la’os Díli maibé sensibilizasaun ne’e bele to’o iha Postu adminitrativu, Suku no Aldeia para ita bele hamate moras HIV-SIDA ne’e” dehan nia ba jornalista sira iha Pantai Kelapa Díli, Sesta (17/04).
Nia haktuir, sidadaun timoroan hotu atu kontribui hodi kombate moras HIV-SIDA la’os de’it ba partidu KHUNTO nia emar de’it maibé jovens hotu-hotu iha timor laran tomak hodi prevene aan ba moras HIV-SIDA duke kura.
Moras HIV-SIDA laos ba Partidu KHUNTO nia oan de’it maibé ba Juventude sira hotu-hotu iha ne’ebé de’it sira prontu para atu kontribui lalais ba sira nia moras.
Tanba ne’e parte Saúde mós atu haree mós ba iha seguransa iha liña fronteira tamba buat hotu mai husi liña fronteira entaun oinsa mak estadu atu bele kria kondisaun sira ne’ebé di’ak atu nune’e bele atende lalais se lae moras HIV-SIDA bele daet ba ema hotu-hotu.
“Ita nia populasaun 1 miliaun resin de’it se rihun rua ona mak hetan moras HIV-SIDA signifika katak loron ida ita la interven lalais ho kondisaun ida hanesan ne’e mak bele daet ba ema seluk atu estraga ita nia joven sira”dehan nia.
Primeiru tenke kria kondisaun ida mak estadu tenke tau osan ba iha INCSIDA atu sira bele kontrola lalais ba iha postu suku sira tamba iha Díli sira bele detekta moras ida ne’e.
“Mais iha suku,entaun ita labele hetan moras ida ne’e dala-ruma ita timoroan bele sae to’o rihun ida ba leten tamba ema hotu-hotu tauk no moe atu ba Konsulta nia moras”dehan nia.
Iha fatin hanesan Presidente INCSIDA.Ip, Daniel Marçal, joven sira ne’ebé iha partidu laran ne’e inportante tanba partidu politik mak sei fó kontribuisaun di’ak ba dezenvolvimentu nasaun.
“Ita haree alin sira ne’ebé iha partidu nia laran ami mós hasoru ona presidente Repúblika katak ne’e prekupasaun internasionál la’os grupu ida”dehan nia.
Enkuantu Juventude Partidu KHUNTO iha munisípiu Díli ne’ebé partisipa iha Sensibilizasaun kona-ba moras HIV-SIDA ne’e kuaze 300 resin.
Jornalista Estajiária : Dulce Magalhães
Editór : Herminio Cardoso