Loluwari Média (Bobonaro) – Partidu Kmanek Haburas Unidade Nasional Timor Oan, (KHUNTO) halo reajustamentu estrutura no posse ba estrutura foun iha munisipiu Bobonaro, alende ne’e simu afialiasaun militante husi Partidu kongressu Nasional Rekonstrusaun Timorense (CNRT) no Partidu Democratico (PD), afiliasaun militante ne’e simu direita husi Prezidente partidu KHUNTO, Armanda Berta dos Santos no Konsileiru maximu, Jose dos Santos “Naimori Bucar”.
Prezidente partidu KHUNTO, Armanda Berta dos Santos, fiar estrutura munisípiu Bobonaro sei servisu makaas atu hetan votus maioria iha eleisaun parlamentár tinan 2027-2028.
“Hau fiar katak Bobonaro sei hamutuk ho estrutura ida ohin sei bele hetan votus barak liu, tanba ita sei hasoru eleisaun iha 2027 no 2028. Entaun ita nia baze labele husik mamuk, ita presiza kompleta estrutura postu, ha’u fiar ho ita bo’ot sira nia prezensa votus sei bele aumenta barak liu tan iha 2027 no 2028.
Maibé presiza ita nia servisu foin mak bele atinji mehi ne’ebé mak ita hakarak, karik partidu manan iha 2027 no 2028, presiza ita bo’ot sira nia kapasidade atu hamutuk haree ba dezenvolvimentu ita nia nasaun, entaun hahu agora tenke esforsu an, ho estrutura foun ida ne’e ha’u fiar katak imi sei halo diak liu tan iha munisipiu Bobonaro”. dehan Prezidente Partidu KHUNTO, Armanda Berta dos Santos ba Militantes sira iha Maliana (02/08).
Konsileiru maximu Partidu KHUNTO, José dos Santos “Naimori Bucar”, husu estrutura munisípiu Bobonaro prepara an hodi sai líder ne’ebé di’ak, husi nasionál to’o munisípiu, hanoin di’ak, polítika di’ak no polítika mai husi fuan, polítika labele mai husi matan, tanba matan bele hamosu buat ne’ebé la di’ak iha povu nia oin, nune’e polítika ida ne’ebé diak atu lori nasaun ne’e ba oin.
“Se karik ita bo’ot sira tama ona iha estrutura ida hanesan ohin, komesa ona prepara an atu bele sai lider ida husi kraik ba leten, se ita bo’ot sira nia hanoin ida ne’ebé diak ba politika aban bainrua sei sai valor ba ema hotu-hotu ita nia politika ne’e mak lori nasaun ba oin, politika mak tenke diak, primeiru politika ne’e mai husi fuan.
Politika la’os mai husi matan, tanba matan ne’e bele halo buat ruma sala, politika tenke proteje sira hotu hanesan sidadaun rai ne’e nian, politik ne’e ita atu dudu nasaun ba oin, ne’ebé agradese ba estrutura foun maibé tenke brani hodi responde ba politik ne’ebé la’o iha imi nia oin, politika ne’e la fasil politika ne’e manas, midar, sin mai dala ida.
Naimori Bucar mos husu diskulpa ba komunidade postu Cailaco kona-ba akontesimentu iha suku Cailaco, tanba ne’e husu ba joven sira hodi hamutuk lori nasaun Timor-Leste ba oin.
“Ho haraik an nu’udar lider partidu KHUNTO, ha’u husu diskulpa ba problema ida iha Cailaco ne’eba ha’u rasik husu diskulpa ha’u hakarak imi hamutuk lori Nasaun ne’e ba oin”
Xefe Aldeia Holsa, Rofino Carlos, nu’udar militante ativu CNRT ne’ebé deside afililia ba partidu KHUNTO deklara hakarak hamutuk fali ho KHUNTO, tanba lakohi promesa falsu sira, nune’e deside hamutuk ho KHUNTO atu dezenvolve munisípiu Bobonaru sai diak iha futuru.
“Ha’u mai hamutuk ho partidu KHUNTO, tanba ha’u hakarak servisu hamutuk ho partidu KHUNTO atu bele hadia buat ruma iha Bobonaro ne’e, tanba barak ukun ona mas bosok mak barak mai promete, mais rezultadu laiha, ne’ebé ha’u la mai mesak povu no joven barak hakarak mai komu ho kultura ne’ebé ha’u reprezenta sira hakarak mai hamutuk ho partidu KHUNTO”.
Koordenador partidu KHUNTO munisípiu Bobonaro, husu estrutura nasionál tau matan ba militante partidu KHUNTO munisípiu Bobonaro.
Jornalista : Anis