Loluwari Média (Liquiça) – Tu’ir Koordenadora Eskola Fazenda Bazika 1,2 siklu, Filomena de Jesus Alves, eskola ne’ebé estudante husi suku 5, nia oan mak aprende iha Eskola Bazika Fazenda (EBF), lokaliza iha suku Leotla, postu administrativu Bazartete, munisípiu Liquiça, durante tinan 4 enfreta problema menus profesór nune’e, profesór ida tenke hanorin materia Ualu (8) ka hanorin jeral.
“Ami nia difikuldade mak professór la to’o, kada professor tenke hanorin materia 8, ka hanorin jerál de’it tanba ne’e mak ami husu ba Prezidente Repúblika (PR) no Ministra Edukasaun (ME) atu tau atensaun sériu ba ami nia eskola ne’e.” Dehan, Koordenadora EBF 1 no 2 siklu, Filomena de Jesus Alves, ba jornalista sira, iha suku Leotla, munisípiu Liquiça, Sábadu (02/08).
Nia hatete, tu’ir loos kada disiplina ne’e, tenke iha professor ida, maibé iha eskola refere professor sira tenke hanorin jerál de’it. Tanba ne’e husu Prezidente Repúblika no ba Ministériu Edukasaun atu aumenta tan professor ba eskola refere.
“Ha’u sente difikulta tebes tanba atu domina (kuasai) matéria ne’e difisil, tanba ne’e ami presiza aumenta tan professor nune’e kada manorin ida lori disiplina Matemátika, nia lori Matemátika de’it, Portugués, nia Portugués loos de’it para labele manorin ida lori materia 8. Se disiplina 8 mak ami hanorin jeral de’it ne’e difisil tebes ba ami.”
Problema ida ne’e eskola enfrenta durante tinan 4 ona eskola EBC Fazenda hasoru maibé ate agora Ministériu relevante seidauk solusiona nia problema. No nia rasik kordenadora ba eskola maibé sai mós profesora da turma, no dala ruma estudante sira sai vitima, tanba servisu barak.
“Ha’u hanesan Koordenadora ba eskola maibé sai mós profesora da turma, entaun tempu lato’o ba ha’u, atu halo servisu administrasaun. Koordenadóra mós hanorin estudante, dala ruma ha’u nia estudante sai vitíma, tanba ha’u nia servisu ne’e barak.”
Kona-ba matéria, estudante husi 3 ano to’o 6 ano, matéria hamutuk 9, mak, Literásia Tetum, Literásia Portugués, Matemátika, Siénsia Sosiais, Siénsia Naturál, Siénsia Saúde, Arte no Kultura, Edukasaun Fízika, no Relijiaun.
Alende ne’e Eskola Ensinu Bazika Fazenda mos infrenta problema bee moos. Bainhira atu prepara merenda eskolár ba estudante sira Professor sira tenke sosa bee moos mak prepara ai-han merenda eskolár ba estudante sira.
Problema seluk ne’ebé EBF Fazenda hasoru mak menus meja kadeira ba estudante sira, inklui Biblioteka iha eskola, nune’e professor sira iha mekanizmu halo de’it mini Biblioteka iha sala laran hodi hala’o prosesu aprendizajen ba estudante sira.
“Biblioteka laiha, ami halo mini Biblioteka iha sala laran de’it, ami tau de’it livru sira iha meja leten hodi organiza labarik sira foti livru lee.”
Totál , estudante iha ekola Bazika Fazenda hamutuk 255, husi 1o ano to’o 6o ano.
Jornalista : Chay Risky