Loluwari Média (Dili) – Konsellu Imprensa Timor-Leste (CITL) realiza diskusaun ba proposta alterasaun lei Komunikasaun Sosial ho media na’in, representante Asosiasaun Jornalista no dirijente jornalista sira ne’ebé iha relasaun direita ho dezenvolvimentu era dijital ida ne’e.
Prezidente Konsellu Imprensa Timor-Leste (KITL), António Maria da Cesar Moniz Mali, hatete, iha diskusaun ba alterasaun lei komunikasaun sosial ne’e importante tebes atu no ajusta lei Komunikasaun sosial ne’e bele sai mata dalan atu regula jornalista sira iha era dijital.
“Ha’u hanoin ita hotu iha ne’e nia kontribuisaun importante teb-tebes ba ita hotu bele fahe hanoin atu ajusta buat ne’ebé maka ita hotu hakarak atu tuir duni sai lei ne’ebé sai mata dalan no regula ita hotu iha vida jornalizmu nian”. dehan Presidente konsellu imprensa Timor-Leste (KI-TL), António Maria da Cesar Moniz Mali, iha Quintal Bo’ot, Tersa (05/08).
Segundu mandatu konsellu imprensa Timor-Leste (KI-TL), hato’o ona proposta revizaun ba Sekretáriu Estadu Komunikasaun Sosial (SEKOMS) atu halo esbosu final ida nune’e sai nu’udar baze ida hodi konsulta públiku liliu komunidade media sira hodi la’o tu’ir lei.
“Ita hafoin konsellu imprensa anterior iha segundu mandatu nian hato’o tiha proposta revizaun ne’e ba ita hotu he’in bainhira mak governu ka Sekoms iha esbosu final ida para ita bele uza ne’e nu’udar baze ida hodi ita halo konsulta públiku no mós liu-liu konsulta ba komunidade media sira.
“Ohin ita kala avansa uluk ona tanba lei ne’e iha ona mais ida ne’e seidauk final. Ita nia kontribuisaun ita sei kontribui hanoin balu atu kompleta liu tan lei ne’e atu sai hanesan versaun final ida, hanesan ohin ha’u dehan atu bele sai base ida ba konsulta públiku no konsulta komunidade media sira”. Nia afirma.
Entretantu iha diskusaun proposta alterasaun lei Komunikasaun sosial ne’e partisipasaun husi Prezidente Tatoli.IP, Prezidente Asosiasaun Jornalista, prezidente Timor-Leste Press Union, media na’in no Diretór sira no jornalista husi plataforma dijital.
Jornalista : Anis