Loluwari Média (Díli) – Konsellu Ministru aprova dezeñu kona-ba prejetu konvensaun Internasionál ne’ebé sei halo iha Portu Dili ne’ebé tuir planu governu sei halo lansamentu iha fulan Maio tinan ne’e.
Reprezenta Ministru Konsellu Ministru, Sekretáriu Estadu Komunikasaun Sosiál (SECOMS) Expedito Dias Ximenes hatete, Konsellu Ministru aprova dejeñu ho karakterístika ondas ne’ebé sei halo portu Dili.
Konsellu Ministru hasoru aprova dezeñu arkitetóniku ba Sentru Konvensaun Dili foun, ne’ebé aprezenta hosi Vise-Primeiru-Ministru no Ministru Koordenadór ba Asuntu Ekonómiku, Francisco Kalbuadi Lay.
Projetu estruturante ne’e ho intensaun atu sai uma-na’in ba enkontru sira ASEAN nian durante Timor-Leste nia prezidénsia iha tinan 2029, inklui simeira Xefe Estadu no Governu sira nian, no mós eventu ho eskala boot sira seluk.
Sentru konvensaun foun sei harii iha área portu tuan nian, iha Baía Dili nia ninin, no sei inklui edifísiu prinsipál ida ho sala konferénsia sira, auditóriu sira no pavillaun sira espozisaun nian.
No mós área komplementár sira ba tempu livre no turizmu nian, inklui paseiu ida iha kais nia sorin, akuáriu ida, no espasu divertimentu no komersiál ida.
Alende ne’e Konsellu Ministru mós aprova projetu Rezolusaun Governu ba nomeasaun Duílio Marino Gusmão Araújo da Silva nu’udar Diretór Ezekutivu ba Ajénsia Promosaun Investimentu no Esportasaun Timor-Leste, IP Inves-Leste koñesidu ho naran Viajen Timor-Leste.
Nomeasaun ne’e bazeia ba nia kompeténsia téknika no aptidaun ne’ebé hatudu ba kargu ne’e, ba mandatu tinan tolu, ho baze eskluzivu.
Desde 2019 iha TradeInvest Timor-Leste, Duílio Marino Gusmão Araújo da Silva hala’o kna’ar nu’udar Adjuntu Diretór, tanba antes ne’e okupa ona kargu sira hanesan Diretór Promosaun Esportasaun, Jerente Promosaun Esportasaun, no Jerente Relasaun Esterna no Marketing..
Nune’e mós Hafoin aprezentasaun husi Vise-Ministra Finansas, Regina de Jesus, Konsellu Ministrus deside atu autoriza Ministra Finansas hodi asina akordu subvensaun rua ho Ajénsia Kooperasaun Internasionál Korea (KOICA).
Ba projetu sira “Dezenvolve Kapasidade Restaurasaun Floresta no Jestaun Sustentável iha Timor-Leste” (2026–2033) no “Programa ba Ai-han no Nutrisaun Seguransa, Alimentasaun Eskolár, Fortifikasaun Ai-han no Infraestrutura Eskolár” (2026–2030).
Projetu restaurasaun floresta ne’e, ho subvensaun estimadu millaun $ 6 dolar amerikanu ho durasaun tinan neen, ne’ebé abranje Munisípiu Baucau no Manatuto.
Ninia objetivu mak atu hametin prevensaun degradasaun ambientál no promove rekuperasaun ekosistema floresta liu-husi modernizasaun sentru viveiru nasionál, implementasaun programa reflorestasaun, no kapasitasaun instituisaun públika no komunidade lokál sira.
Prevé mós envolvimentu diretu husi tékniku no ofisiál públiku sira, no mós partisipasaun ativu husi komunidade sira iha jestaun sustentável ba floresta sira.
No Programa nutrisaun no seguransa ai-han ne’ebé finansia ho orsamentu millaun $7,2 ho durasaun tinan lima, sei implementa iha Munisípiu Baucau, Bobonaro, Manufahi, no Viqueque.
Projetu ne’e ho objetivu atu hadi’a kondisaun ai-han no nutrisaun eskolár liu-husi hametin infraestrutura no ekipamentu dapur eskolár, implementa sistema jestaun no monitorizasaun, fortifikasaun ai-han.
No promove kadeia fornesimentu bazeia ba produsaun agríkola lokál,Inklui mós formasaun ba profesór sira, pesoál eskola nian, no komunidade sira, no mós apoiu ba dezenvolvimentu agrikultura lokál hodi fornese ba eskola sira.
Jornalista Estajiadu : Quintão dos Santos Tilman
Editor : Herminio Cardoso