Loluwari Média (Díli) – Komisaun D Parlamentu Nasionál aprova ona relatóriu kona-ba Proposta Lei Propriedade Industrial no prepara atu hato’o subemete ba Prezidenti Parlamentu Nasionál hodi ajenda ba debate no aprovasaun iha plenária.
Prezidente Komisaun D Parlamentu Nasionál, Ricardo Baptista, hatete iha semana kotuk komisaun halo ona audiénsia públika ho Ministériu Komérsiu Indústria ne’ebé nu’udar proponente ba proposta lei refere, no sosiedade sivíl, setór privadu sira atu rona sira nia hanoin kona-ba inisiativa legál.
“Semana kotuk ami halo audiénsia ho entidade relevante sira hotu, liu-liu ho Ministério Komérsiu no Indústria nu’udar proponente ba lei ne’e. Ami mós bolu organizasaun sosiedade sivíl no setor privadu sira hanesan ACCTL, Asosiasaun Kafe no Asosiasaun Empresáriu Xina iha Timor-Leste atu hato’o sira nia hanoin kona-ba proposta lei ne’e,” dehan Prezidente Komisaun D Parlamentu Nasionál, Ricardo Baptista, iha Sala Konferénsia Parlamentu Nasionál, kuarta (10/06).
Nia informa, maioria entidade sira ne’ebé partisipa iha audiénsia ne’e fó hanoin hanesan de’it katak Lei Propriedade Industrial importante tebes atu garante dezenvolvimentu no seguransa ba atividade industriál iha TL.
“Entidade sira hotu hanoin katak lei ne’e importante tebes tanba la’os de’it regula indústria manufatura, maibé mós propriedade intelektuál. Lei ne’e iha relasaun ho adezaun Timor-Leste ba Organizasaun Komérsiu Mundiál (OMC) no ASEAN, maibé la’os tanba adezaun de’it. Timor-Leste presiza duni lei ida ne’e atu asegura propriedade no direitu ema nian”dehan nia.
Tuir nia, lei refere sei fó protesaun ba propriedade industriál no propriedade intelektuál sira, inklui produtu no inovasaun sira atu labele hetan falsifikasaun ka imitasaun husi parte seluk.
“Dala-ruma ema nia produtu ka propriedade industriál ruma bele hetan falsifikasaun ka imitasaun. Tanba ne’e mak lei ida ne’e importante tebes. Setór privadu sira mós agradese ba Governu tanba hato’o proposta lei ida ne’e ba Parlamentu atu diskute no aprova,” dehan Ricardo Baptista.
Tanba ne’e, Komisaun D sei hato’o relatóriu refere ba Sekretariadu Parlamentu Nasionál no Prezidenti Parlamentu Nasionál atu prepara agenda debate iha plenária.
“Ami hanoin katak aban ka iha loron hirak tuir mai ami sei hato’o relatóriu ne’e ba Sekretariadu no Prezidenti Parlamentu Nasionál atu haree possibilidade agenda ba debate no aprovasaun iha jeneralidade antes remata fulan ida ne’e”dehan nia.
Proposta Lei Propriedade Industrial ne’e konsidera importante atu hametin protesaun ba propriedade intelektual no atividade industrial sira iha Timor-Leste, nune’e bele fó seguransa jurídika ba investidór no emprezáriu sira iha futuru.
Jornalista Estajiária : Dulce Magalhães
Editór : Herminio Cardoso