Loluwari Média (Díli) – Autór sira ne’ebé durante halo atividade ilísitu Scaming call Senter iha Timor-Leste la utiliza ona Sim Card husi operadór husi Telekomunikasaun,maibé sira komesa uza direta rede Starlink.
Diretór DSIKN Superintendente Xefe Polísia Joao Belo dos Reis hateten,durante ne’e Polísia halo identifiksaun ba suspeitu sira prátika scaming call Center inklui ba operadór Telkomsel,Timor Telekom no Telemor.
No mós ba Telekomunikasaun sira halo justifikasaun tanba saida sira produs Sim Card barak hodi fó ba kompañia sira hodi utiliza ba Scaming call Senter ne’e.
Maibé bainhira PNTL halo identifikasaun realidade autór sira la utiliza ona Sim Card hodi halo atividade ilísitu Scaming call Senter maibé sira uza fali starlink ne’ebé oras ne’e kompañia Vorakai fornese iha rai laran.
“Bainhira ita indentifika Operadór ba Telkomsel,TimorTelekom no Telemor mak, sira agora halo operandu foun ne’ebé sira agora utiliza telefone sira ne’e la uza ona Sim Card,ne’e modus operandu foun maibé ita sei buka tuir hotu”dehan nia ba jornalista sira iha Kuartel Jerál PNTL Kaikoli Díli, kuarta (15/07).
Mosu operasaun ne’ebé suspeitu ba kazu Scaming call Center sira utiliza agora dadaun laos ona uza telefone sira ne’ebé mak uza Sim Card tanba PNTL prende telefone sira ne’e kuaze la uza ona Sim Card,maibé liga direita ba Starlink.
“Autór sira direta liga ba Starlink,ho sira nia komunikasaun ne’e mak agora evolusaun ba krime ida ne’e loron ba loron aumenta ne’ebé ita-nia konesimentu,ita-nia prosesu investigasaun mós tenke eleva ho sira-nia teknolojia ne’ebé sira iha.”dehan nia.
Tanba ne’e,Autoridade Seguransa PNTL halo ona enkontru ho diretór ANC ko’alia kona-ba asuntu ida ne’e para bele kontrola Starlink tama Timor rejistu oinsá ema bele hetan lisensa ka lae.
“Ami kulia ona ho parte ANC ba futuru bele regulariza ba Starlink ne’ebé agora dadaun lao iha Timor-Leste”dehan nia.
Autór ba kazu ne’ebé envolve Scaming call Center ne’e polísia halo ona kooperasaun ho parseiru sira ne’ebé iha esperiénsia di’ak ne’ebé hatene motivu krime ilísitu sira ne’e.
Tanba iha pasadu sira mós iha esperiénsia atende kazu sira hanesan ne’e husu sira nia apoiu depois krime sira ne’e nia hun ne’e mai husi nasaun ida ne’ebé.
Tanba ne’e Komandante Jerál PNTL fó ona orientasaun ba DSIKN no Servisu informasaun Polísia atu buka tuir hodi taka atividade ilísitu iha TL.
“Komandante Jerál fó ona orientasaun ba Komandante Munisípiu hotu-hotu atu kontrola, haree no identifika fatin Scaming call Senter ne’ebé dadaun ne’e tama ona ba munisípiu balun atu nune’e DSIKN bele halo intervensaun lalais”
Nia haktuir,Autoridade Seguransa PNTL sei desmantela rede jogu online Scaming call Center ne’ebé agora dadaun buras iha Timor-Leste.
Tanba Kazu Scaming call Senter ne’e problema nasaun nian ne’ebé tenke responde ho kolletivu, labele haree servisu ne’e DSIK nian ou PCIC nian ka Tribunál nian.
Maibé tenke responde ho koletivu atu iha futuru labele sai hanesan fatin baze ba krime organizadu sira ne’e atu eziste iha TL.
Autoridade Seguransa PNTL ne’e husu ba Autoridade Lokál iha munisípiu hot-hotu inklui komunidade sira hotu-hotu atu servisu hamutuk kombate krime jogu online Scaming ne’e.
“Ha’u husu ba parte hotu-hotu ita tenke servisu hamutuk atu bele kombate kazu ilísitu jogu online Scaming call Center iha Timor-Leste.”
Jornalista : Cesar Pires
Editór : Herminio Cardoso