Loluwari Média (Bobonaro) – Prezidente Repúblika (PR), José Ramos Horta, halo vizita direta ba foho Lesululi, suku Meligo, Postu Administrativu Cailaco, Munisípiu Bobonaru,hodi haree fosíl reptíl mariñu ida ne’ebé identifikadu ona hanesan Ichthyosaurus, ne’ebé konsidera mós ho idade liu ona tinan millaun 208.
Fosíl ne’e, tuir informasaun sientífika konsidera nu’udar patrimóniu jeolójiku importante ida ba Timor-Leste no PR nia vizita ne’e refleta interese Estadu nian hodi promove investigasaun sientífika no konservasaun patrimóniu naturál ba Timor-Leste.
Durante vizita, Prezidente deskoberta bele sai pontu estratéjiku ida ba dezenvolvimentu turizmu sientífiku no edukativu, liu-liu iha Munisípiu Bobonaru.
“Ha’u husu parte relevante sira kontinua halo estudu kle’an hodi garante konservasaun no aproveitamentu sustentável ba futuru” Dehan Prezidente Repúblika (PR), José Ramos Horta ba jornalista sira iha suku Meligo Bobonaru, kuarta (08/04).
Iha vizita PR ne’e Autoridade lokál no komunidade sira simu PR ho entuziazmu prezensa Prezidente nian, no espera katak bele sai atensaun mós ba governu bele lori benefísiu reál ba dezenvolvimentu lokál iha TL.
Iha sorin seluk Vise prezidente Instituto de Geociências Timor-Leste (IGETL), Victor Aleluia de Sousa Vicente, hatete, agora dadaun sira servisu hamutuk hela ho Televizaaun Brodcasting BBC husi Reinu Unidu, atu halo kobertura dokumentáriu ida kona-ba fosíl ne’e, ho planu atu publika iha 2028, hodi promove Cailaco no Timor-Leste ba nivel internasionál.
“Inisiativa tuir mai mak ami sei lori sitiu fosíl ne’e atu hetan rekoñesimentu nu’udar UNESCO “Global Geopark”, maski prosesu ne’e la fasil.maibé, se rekoñese, bele atrai turista no investimentu no dinamiza ekonomia lokál hanesan alojamentu, restaurante no hotelaria”
Geologista Isaias dos Santos Barros, deskobre fatin fosíl ne’e, nia parte sei kontinua servisu hamutuk ho péritu sira atu prepara artigu sientífiku ida ho kualidade ba publikasaun iha jornál internasionál, hodi hasa’e importánsia sientífika husi deskobrementu ba fósil ne’e rasik.
Alende iha biban ne’e mós ekipa Prezidénsia Repúblika liu husi unidade sosiedade sivil no asuntu sosiál (SSAS) distribui mós nesesidade bázika hanesan ai-han, roupa no ekipamentu desportu ba komunidade sira ne’ebé mai husi suku 8 iha Postu Cailaco.
Jornalista : Cesar Pires
Ediór : Herminio Cardoso