Loluwari Média (Díli) – Komandante Munisípiu Dili (KMD), Superintendente Xefe Polísia, Orlando Gomes, hatete, Polísia Nasionál Timor-Leste (PNTL), preparadu ona atu garante seguransa ba selebrasaun misa tinan ida vizita Maktoban Sua Santidade Papa Francisco mai Timor-Leste ne’ebé sei halo iha Tasi Tolu kinta (10/9) aban.
“Ohin ita halo enkontru, no breafing ona ba membru sira aban ita hotu-hotu sei apoia máximu iha Tasi- Tolu. Atu nune’e selebrasaun ne’e mós la’o di’ak movimentu ita nia sarani sira iha kapitál Dili no mós sarani sira husi munisípiu seluk ne’ebé mak mai iha kapitál Dili mós la’o ho di’ak la’o organizadu.” Dehan Komandante Munisípiu Díli Superintendente Xefe Polísia, Orlando Gomes, ba jornalista sira iha Kaikoli, Dili, Tersa (09/09).
Orlando esplika, selebrasaun seguransa misa tinan ida vizita Sua Santidade Papa Francisco, mai Timor-Leste, ne’ebé sei hala’o iha Tasi-Tolu ne’e, Komandu PNTL Dili hetan apoiu husi Unidade Espesiál Polísia (UEP) Unidade Polísia Maritima (UPM) Komandu Jerál atu nune’e bele garante seguransa ba selebrasaun misa tinan ida vizita Sua Santidade Papa Francisco mai Timor-Leste.
“Ami identifika ba parajen ba sarani sira ne’ebé husi munisípiu atu mai partisipa misa iha Tasi-Tolu liliu ba sarani husi parte Oeste sira sei mai konsentra iha Pelican Paradise. Sarani sira husi parte Leste sei okupa Tasi-Tolu no mós kampu de Aeroportu nian atu nune’e husik dalan luan atu ema bele halo movimentu ba mai ho livre inklui transporte mós ba mai ho livre.”
Komandu husu ba sarani hotu hamutuk atu garante situasaun sai di’ak no seguru ba ema hotu.
“Ami sei halo servisu ho di’ak liu kontrola movimentu transporte ho di’ak tanba polísia tránzitu Dili kordena ona ho Tránzitu Nasionál atu kontola dalan nune’e transporte bele la’o normál.”
Maske transporte motór no karreta ikus ikus ne’e barak, maibé polísia nafatin halo ninia servisu hodi asegura fasilita dalan sira ne’e, fó espasu nune’e transporte sira seluk bele la’o hanesan bain bain.
Jornalista : Chay Risky