Loluwari Media (Dili) – Membru Falintil-Forsa Defesa Timor-Leste (F-FDTL) hamutuk Ema na’in 20 remata ona kursu formasaun lideransa nian iha Instituisaun EIROS.
Xefe Gabinete, xefe Estadu Maior Jenerál Coronel Marcelino Ximenes “Rizai” apresia tanba formadór EIROS sira fó ona formasaun lideransa ba membru sira.
“Obrigadu barak ba imi nia pasiénsia, dedikasaun, no koñesimentu ne’ebé imi iha fahe ona ba ami nia membros sira,imi la’ós de’it fahe teoria husi livru maibe imi fahe mós imi nia esperensia ne’ebe imi iha” dehan nia ba jornalista sira iha Quartel Geral Fatuhada tersa (23/03).
Instituisaun EIROS hanorin membru F-FDTL sira atu sai lider la’os de’it kona-ba foti desizaun, maibé mós kona-ba rona ka simu ema seluk nia opiniaun.
Tanba EIROS nia prezensa sai ona nu’udar naroman ne’ebe ajuda instiuisaun F-FDTL atu identifika potensiál ne’ebe subar hela,sente katak koñesimentu ne’ebé iha kuda ona ba sira.
“sei haburas liu tan hodi fó benefisiu ba instituisaun no ba ita nia nasaun,”dehaan nia.
Coronel enkoraza, atu sai lider tenke serví ho haraik an, la’os lider ne’ebé hakarak ema serví nia,maibé tenke sai lider ne’ebé fó solusaun, la’ós lider ne’ebé sai parte husi problema, lider ne’ebé kria lider foun, hodi hametin kontinuidade ba futuru.
“Ita sai lider ita sai servidór laos sai bo’ot ita sai atan ba ita nia membru sira tanba ita aprende lideransa nia fó valór ida ne’ebe di’ak nia fó inspirasaun ne’ebé di’ak”dehan nia.
Formandu Alferes Maria Juina nós apresia ba instituisaun EIROS tanba ho nia dedikasaun no profisionalismu hodi fó formasaun lideransa atu dezenvolve iha parte lideransa nian.
“Ami mos hato’o ami nia apresiasaun aas ba formadór husi Eiros Sr. Luis ne’ebé ho dedikasaun profissionalizmu no pasensia orienta ami durante prosesu aprendijazen sira”dehan nia.
Nia haktuir, formasaun ne’e membru F-FDTL sira sente preparadu liu tan atu enfrenta dezafiu sira iha futuru no kontribui ho efisensia ba dezenvolvimentu instituisaun nian.
Enkuantu Diretora Ezekutivu Eiros Maria Antónia de Souza, agradese ba Instituisaun F-FDTL tanba kontinua fó fiar ba Instituisaun EIROS hodi kontinua fó formasaun ba membru sira.
“Liu husi biban ida ne’e hau hakarak hato’o hau nia agradese wain tebes ba F-FDTL ne’ebe nafatin fó fiar ba ami Instituisaun Eiros hodi fornese formasaun ba ita bo’ot sira”dehan nia.
Jornalista : Alberto Pires
Editor : Herminio Cardoso