Loluwari Média (Díli) – Governu Timor-Leste liu husi Ministériu Defeza (MD) hamutuk ho Estadus Unidus Amérika kontinua hametin liutan kooperasaun amizade atu bele dezenvolve iha setór Defeza.
Ministru Defeza (MD), Kontra Almirante Donanciano Costa Gomes “Pedru Klamar Fuik” hatete, Relasaun Amizade ne’ebé TL ho EUA iha programa ne’ebé dezenvolve ho EUA tanba Timor-Leste nia independénsia hetan apoiu makas husi Kongresu EUA.
“Husi ne’e kedas ita nia relasaun Bilaterál no diplomáta entre EUA ho TL dezenvolve, en partikular Dezenvolvimentu iha kooperasaun ambitu Militár no Defeza, insentifika ho aktividade ne’ebé EUA halo iha ita nia rain” Dehan Ministru Defeza (MD), Kontra Almirante Donanciano Costa Gomes “Pedru Klamar Fuik” ba jornalista sira hafoin hasoru malu ho Jenerál EUA iha Kuartel General Fatuhada Díli, Tersa (31/03).
“Klamar Fuik” Esplika,Jenerál EUA mai para atu intensifika fila-fali programa Stayed Patner Program ne’ebé Dezenvolvidu ona entre TL ho EUA ho Estadu Rhode Island no mós programa ámbitu Militár ho Militár.
“Iha mós programa mais abrajante ne’ebé relasiona ho ita nia governu ho governu EUA no mós sosiedade ba sosiedade no mós iha programa ne’ebé atu dezenvolve husi sosiedade TL ho Sosiedade EUA Stay Patner Sip ne’ebé mak Rhoad I leaning halo iha Baucau no aktividade barak mak sei fo benefisiu mai TL” dehan nia.
Enkuantu Xefe Estadu Maiór Jenerál Falintil Forsa Defeza Timor-Leste (F-FDTL), Tenente Jenerál Domingos Raul “Falur Rate Laek” reforsa enkontru entre Jenerál EUA ko’alia kona-ba kooperasaun TL ho EUA no mós ho sira nia programa ne’ebé iha mak Formasaun no kapasitasaun ba Militár TL nian.
“Ami ko’alia mós kona-ba ezersísiu konjunta no multilaterál bilaterál ne’ebé halo iha Timor no sira apoiu ita nia logístika nian doasaun ne’ebé sira fó no Instituisaun apoiu forsa komponente Aérea ligeira nian”dehan nia.
Tanba ne’e kooperasaun ba oin EUA sei mantein fó kapasitasaun ba F-FDTL husi Komponente Navál, Komponente Terrestre no Komponente Aérea ligeira apoiu ba ezersísiu no mós kombate Dezastre naturais nian.
Tanba F-FDTL prioridade liu mak rekursu humanu nian tanba dezenvolvimentu teknolojia no mudansa siénsia Militár tanba ne’e F-FDTL mós prepara rekursu humanu.
Nune’e,Maiór Jenerál Rhode Island Estadus Unidus America (EUA), Andrew Joseph Chevalier agradese tanba Ministériu Defeza ne’ebé parseria ho EUA ne’e antes dékada hirak liu ba antes Timor-Leste hetan nia independénsia.
“Ami valoriza ita nia parseria ida ne’e no ami sei haree ba oin oinsa ami atu aprofunda liutan ita nia parseria ida ne’e ba futuru, tanba ne’e ohin ami enkontru ho Ministru Defeza oinsa ami bele haree área Defeza no mós ami bele haree asisténsia notoria no mós desastre naturais nian”dehan nia.
Tanba ne’e atu dezenvolve parseria ne’ebé iha mak sei kria enkuadramentu parseria no lori povu EUA fó komprimentus ba povu TL.
Jornalista : Cesar Pires
Editór : Herminio Cardoso