Loluwari Média (Díli) Komandante Jerál foun Polísia Nasionál Timor-Leste (PNTL), Komisariu asistente Afonso Dos Santos sei aumenta númeru kadetes PNTL Tinan 2025 ne’ebé governu anula hodi loke prosesu foun.
Tanba ne’e Komandante Jerál PNTL Komisariu asistente Afonso dos Santos sei lori pedidu rekrutamemtu kadetes PNTL foun hamutuk na’in 750 ba Ministériu Interior atu aprova.
“Ha’u sei lori pedidu kandidatu PNTL foun 750 ba Ministériu Interior hodi koloka ba Unidade Espesiál Polísia (UEP) hakarak ka lakoi ha’u komandante Jerál mak rekomenda hodi aprova”dehan nia ba jornalista sira iha Komandu Unidade Polisia Maritima (UPM) Lesidere Díli, Tersa (31/03).
Nia haktuir,Komandante Jerál foun tenke tau prioridade ba kadetes foun 750 hodi bele koloka ba Unidade sira no mós atu asegura ba Eleisaun Prezidensiál ne’ebé besik dadaun ona.
Razaun Komandu Jerál ne’e aumenta tanba Eleisaun Prezidensiál no mós Eleisaun Parlamentár besik ona tanba rekursu númeru PNTL la to’o atu koloka.
“Tanba ha’u nia hakarak ne’e rekrutamemtu PNTL foun ne’e laos 400 de’it maibé ha’u hakarak tenke 750 hodi bele koloka ba Unidade sira bele mós troka sira ne’ebé idade ona”dehan nia.
Nia dehan,2027 no 2028 ne’e Eleisaun Prezidensiál no Parlamentár tanba ne’e urjente rekrutamemtu ne’e laos 400 maibé 750 para bele kobre fatin-fatin.
“Ha’u mak Komandante Jerál ha’u garantia no ha’u sei deside 750 ba MI hakarak ka lakoi tenke nune’e tanba ezijénsia ita hakarak Eleisaun Prezidensiál no Parlamentár lao ho di’ak tenke presiza Membru Polísia atus hitu resin.”dehan nia.
Agora tenke halo Rekrutamemtu mudansa atu labele akontese tan familiarismu tanba Rekrutamemtu hotu-hotu formaliza iha Sentru Formasaun Polísia.
“Ha’u mak Komandante Jerál hakarak ka lakoi MI tenke aseita se nia la aseita tanba saida? tanba ha’u mak Komandante Jerál hakarak ka lakoi Rekrutamemtu tenke iha Komandante Jerál la’ós iha Ministériu Interiór”dehan nia.
Tanba prosesu uluk ne’e Ministériu Interiór mak jere hodi ikus mai sai problema, maibé agora loke prosesu foun ne’e Komandu Jerál mak sei deside hodi jere rasik prosesu tomak no MI haruka ema ida hodi observa de’it.
Jornalista : Cesar Pires
Editór : Herminio Cardoso