Loluwari Media (Díli) – Eis Primeiru Ministru, Taur Matan Ruak, Reflesaun ba loron Komemorasaun 28 Novembru ba dala 49 hanoin pasadu, Prezente no futuru.
“Iha tinan 1975 mai to’o ohin loron historia ida ne’ebé riku ho buat diak ho mos buat at tanba ita nia sofrimentu barak ho nune’e ha’u nia mensajen ba povu doben, Timor-Leste, hadomi ita nia rai, hadomi ita nia povu, tanba nasaun Timor-Leste ema la fo iha bandeza.” Dehan eis Primeiru Ministru, Taur Matan Ruak, ba jornalista sira hafoin halo reflesaun hamutuk ho jornalista sira iha Rezidensia Gabinete Eis Prezidente Repúblika, Taur Matan Ruak, Farol, Dili, kuarta (27/11).
Taur hatete, Timor-Leste hetan nia independénsia ne’e sosa ho ran no terus mak hetan tanba ne’e se de’it mak ukun husi Prezidente to’o Xefe Aldeia ukun ho responsabilidade no servisu ho profesionál.
“Buat ne’ebé ita lori osan mak sosa ita nunka soe, ita nunka halo aat ita kuidadu nia, tanba sa mak ida ne’ebé lori ema mak sosa ita labele kuidadu.”
Taur Matan Ruak mos husu orgaun estadu sira liliu Prezidente Repúblika (PR), Prezidente Parlamentu (PN), Primeiru Ministru (PM) no Prezidente Tribunal Rekursu (PTR) inklui governante sira ukun ho responsabilidade.
“Hau husu ba imi kuidadu servisu ho profesionál tu’ir nafatin sentimentu ne’ebé ida uluk sira fo hela haluha ita nia an tau matan ba ema barak no tau matan ba ita nia nasaun.”
“Ema mak ukun na’in sira kaer ukun iha buat tolu mak interese individual, interese grupu no interese nasaun tau kada idak-idak nia fatin.”
“Tinan ida ita halo reflesaun hanoin kona-ba ita nia sofrimentu no ita hateke ba oin katak ita fiel ho objetivu iha ita nia rai define ba ita nia an hodi hametin estabilidade paz no bem estar iha ita nia sidadaun sira nian mak lori ida ita ba loron ida hodi servisu makaas lori tempu naruk ita sei manan, ha’u nia parabéns, parabéns ba povu Timor-Leste ba loron Komemorasaun 28 de Novembru 24 no gloria eterna ba sira ne’ebé mate no lakon hodi fo ba ita nia rai doben Timor-Leste ida ne’e no ha’u nia solidariedade ba Familia timor laran tomak ne’ebé lakon nia inan aman no familia hotu hodi hari’i nasaun ida nee.”
Jornalista : Chay Risky
Editór : Ilima’a