Loluwari Média (Díli) – Sekretariu Estadu Arte no Kultura (SEAK), Jorge Soares Cristovão, hatete, Timor-Leste nu’udar uma na’in ba jogu Comunidade Países da Língua Portuguesa (CPLP) nune’e ekipa koordenador (CTA) hala’o vizita no haree kondisaun real estadiu municipal Dili, tinan 2025, Timor-Leste sei sai uma na’in ba jogu CPLP.
“Ohin ita nia ekipa CTA halo observasaun ba ita nia Estadiu Munisípal Kaikoli Dili liliu haree liu ita nia infra-estrutura kampu nian atu nune’e ita nia governu bele halo rehabilitasaun iha tempu badak hodi halo prevensaun ba jogu CPLP.” Dehan Sekretariu Estadu Arte no Kultura (SEAK), Jorge Soares Cristovão, ba jornalista sira, iha Estadiu Munisípal Kaikoli, Dili, kuarta (26/02).
Governante ne’e, hatete, Timor-Leste sei prepara Estadiu hodi simu modalidade sira ne’ebé governu prepara ona.
“Iha proxima semana prosesu rehabilitasaun ba ita nia Estadiu Munisípal la’o ona atu prepara ba jogu abertura CPLP nian tanba Prosesu Rehabilitasaun ne’e Ministeriu Juventude Desportu Arte no Kultura (MJDAK) servisu hamutuk ho Ministeriu Planeamentu inklui ADN sira ne’ebé oras ne’e daudaun halo ona verifikasaun ba kustu ne’ebé ita presiza.”
“Iha inisiu Juñu, ita nia rehabilitasaun termina ona atu nune’e Timor-Leste prepara ona ba abertura jogu CPLP.”
Ekipa CTA hala’o operasaun iha Estadiu Munisípal sei kontinua ba Ginagiu, tanba Ginagiu prosesu rehabilitasaun la’o hela no sei kontinua ba kampu tenis lantai, no ekipa CTA sei kontinua ba Kampu voly praia no Estadiu Becora ho kampu ne’e mak governu prepara hodi simu eventu jogu CPLP.
Koordenador Desportu CPLP, Jorge Carvalho, husu governu Timor-Leste, atu halo Rehabilitasaun ba Estadiu Munisípal Kaikoli, Dili hodi prepara maximu ba jogu CPLP nian.
“Tanba tempu besik liu ona ne’ebé ami husu ba governu Timor-Leste atu halo rehabilitasaun ba ita nia Estadiu inklui kampu sira seluk ba modalidade sira seluk nian ami espera katak Timor-Leste sei prepara maximu ba jogu CPLP ne’e rasik.”
Jornalista : Chay Risky