Loluwari Media (Díli) – Ministru Juventude Desportu Arte no Kultura (MJDAK), Nelio Isaac Sarmento, Hatete, Federasaun no Asosiasaun Boxing Timor-Leste iha Problema ba Estrutura tanba tinan hirak ba kotuk Prezidente Federasaun laiha ona no nia Vise mak assume kargu nu’udar Prezidente Federasaun Boxing Interinu maibé buat hotu lao ladiak.
Durante ne’e federasaun boxe Timor-Leste enfrenta problema Tanba ne’e mak Asosiasaun Club Boxing sira ezije ba Prezidente Interinu atu toma responsabilidade ba atividade Boxing sira atu halo kongressu extraordinariu hodi hili estrutura foun federasaun boxe Timor-Leste (FBTL).
“Tanba ne’e ha’u rasik ezije ba Federasaun no Asosiasaun Boxing Timor-Leste, tuur hamutuk atu rejolve ho ulun malirin no buka solusaun no mekanizmu tuir organizasaun nian.” Dehan Ministru Juventude Desportu Arte no Kultura (MJDAK), Nelio Isaac Sarmento, ba jornalista sira iha Ministériu Juventude Desportu Arte no Kultura Díli, Sexta (13/03).
Governante ne’e hatete, Papel Ministériu Desportu nian oinsa atu haree Problema Federasaun no Asosiasaun Boxing iha Timor-Leste, ne’e kapas ona maibé Problema uitoan iha Estatutu Organizasaun nian mak la difine klaru kona-ba Asosiasaun nia ezisensia no direitu.
“Ohin sira hotu-hotu aseita ho ha’u-nia ideias ne’ebé mak ha’u fo ba sira atu sira bele prepara ba asembleia atu sira diskute kona-ba sira nia asembleia no hili fali sira nia estrutura foun hodi bele governu bele apoiu sira, atu nune’e sira bele hala’o nia atividade Boxing iha ita nia rain.”
“Iha Tinan ida ne’e ita tenke realiza atividade Boxing Tolu (3) mak Ita sei realiza atividade kampionatu Boxing Junior iha fulan Marsu no iha Fulan Agustu ita sei realiza kampionatu Nasionál no iha Novembru ita sei realiza jogu Boxing ida hodi nune’e ita halo selesaun hodi partisipa ba Asean Games nian iha Japan.”
Se bainhira Federasaun ho Asosiasaun Boxing mak Problema hanesan signifika Timor-Leste laiha Prepara Boxing ba ASEAN Games nian maibé grasas adeus ohin Federasaun no Asosiasaun Boxing hotu-hotu konkorda atu sira prepara ba sira nia asembleia.
Prezidente Interinu Federasaun Boxing Timor-Leste, João Fernandes, Dehan, ohin Federasaun ho Asosiasaun Boxing Timor-Leste hamutuk Ministériu Juventude Desportu Arte no Kultura ohin halo diskusaun uitoan maibé ho hakarak hotu atu oinsa Boxing Timor-Leste ba oin.
“Ohin ami hotu-hotu hamutuk husi Estrutura Boxing iha Timor-Leste hakarak no prontu Boxing Timor-Leste ba oin tanba Boxing iha Timor-Leste laos foin mak lao maibé lao antes pasadu ona ate agora ne’ebé ami hakarak Boxing ne’e naran bo’ot iha Mundu.”
Federasaun no Asosiasaun ohin ho lian ida de’it oinsa halo preparasaun ba Kongresu hodi hili Estrutura Federasaun Foun atu nune’e Boxing bele la’o ba oin.
“Ami sei halo preparasaun ho ami nia estrutura hotu-hotu iha tempu badak ami sei realiza ami nia Kongresu ba Federasaun Boxing nian.”
Asosiasaun iha Timor-Leste hamutuk 13 inklui Rejiaun Administrativa Espesiál Oé-Cusse Ambeno (RAEOA) Club Boxing hamutuk 31 ne’ebé sei partisipa iha Kongresu Federasaun Boxing iha tempu badak.
Treinadór El-Matador, Abilio Orlando, Dehan Asosiasaun Boxing Timor-Leste, fihir ona fugura diak hodi kandidatu Prezidente Federasaun Boxing ba Kongresu iha tempu badak.
“Ami hanesan Asosiasaun Boxing Timor-Leste ami fihir ona fugura diak ida hodi ba kompete iha Kongresu Federasaun Boxing nian iha tempu badak tanba durante ami lamenta tanba Estrutura Federasaun Antigu laiha transparênsia koletivu ba malu ida ne’e mak ami sente ladiak tanba laiha konsiderasaun ba Club Boxing sira.”
Durante ne’e Asosiasaun halo petisaun ba Federasaun, ohin MJDAK halao enkontru ho Federasaun no mós Asosiasaun Boxing iha Timor-Leste ohin hotu-hotu konkorda ona ho MJDAK katak hakat ba Kongresu.
“Tanba ne’e ami nia petisaun konsege no ami manan duni prosesu ida ne’e hodi hakat ba Kongresu tanba ne’e hau husu ba Asosiasaun no Club Boxing hotu-hotu ita hein Federasaun sei realiza Kongresu Ordinariu ida atu hili ita nia estrutura foun ba Federasaun Boxing Amadora Timor-Leste. Tanba ami nia Problema durante ne’e so solusaun ikus tenke hakat ba Kongresu tanba dalan uniku mak Kongresu.”
Jornalista : Cesar Pires
Editor : Herminio Cardoso