Loluwari Media (Lautém) – Autoridade lokál Suku Serelau, Konsellu Suku, Movimentu Juventude Estudantil Serelau Oan (MJESO) hamutuk ho komunidade sira ensera ona Eventu ba Dame Suku Serelau Epoka III ne’ebé nakonu ho Domin no Pás to’o eventu remata.
Xefe suku Serelau Jeremias Souza hatete objetivu eventu ba dame suku Serelau ne’ebe realiza kada tinan ho nia objetivu mak hakarak atu diverte komunidade iha tempu Natal no Tinan foun.
“Atu nune’e bele diverte ita nia komunidade molok atu ba Natal no iha Tinan foun hodi nune’e bele realiza eventu ne’ebe ke amigavel nakonu ho domin no paz,” Dehan sefe suku Serelau Jeremias Souza ba loluwari.tl iha Sucu Serelau, Sesta (16/01).
Lider Komunitariu Jeremias esplika, jogu eventu ba dame ne’ebé halao iha suku ne’e suporta no apoiu mós husi kompaña lokál sira ne’ebé eziste iha suku Serelau.
Tuir Nia,kompaña lokál sira kios no loja sira ne’ebé hanesan suku Serelau oan sira mós iha inisiativa kontribui ba eventu ida ne’e iha osan kuaze Rihun ida.
“Tuir ita nia planu lolos ne’e modalidade futeboll salaun idade livre no idade 16 no mós voleyball feto no mane iha mós jogu Tradisionál sira”dehan nia.
Maibé, Nia dehan, haree ba situasaun suku Serelau la espera entaun modalidade jogu Tradisionál ne’e lakonsege realiza, realiza de’it mak modalidade futeboll salaun idade livre no idade 16 no voleyball feto no mane.
Iha fatin hanesan,Prezidente Komisaun organizadora, Evaristo da Costa, agradese ba kompaña lokál sira no komunidade sira ne’ebé iha inisiativa rasik hodi apoiu ba eventu jogu ne’e.
“Ami estrutura tomak agradese ba hotu-hotu ne’ebé ho nia hanoin hakarak no apoiu mai ami hodi halao eventu ida ne’e maka ema sira ne’ebé ho fuan ho laran hatudu ninia vontade ba movimentu juventude iha suku”dehan nia.
Apoiu hirak ne’e husi 1F3 Louro Fijec Unipessoal Lda, Rojilda unipessoal Lda, Timirenu unipessoal Lda, S. Puafuin kakamata unipessoal Lda, Heipeliara marjon unipessoal Lda, Produser soi costa, Kioske halenomor.
Fornsedór lokál leoni, keoske juli do ceu, keoske oito filhos, keoske Gil kakamodor, EBF Serelau,MJDAC Postu Lautem, no seluk-seluk.
“Orsamentu ne’ebe komisaun organizadora preve ba eventu ida ne’e osan kontribuisaun no osan registrasaun, totál osan kontribuisaun patrosinador sira hamutuk $630″dehan nia.
Totál osan registrasaun husi ekipa sira futeboll salaun no voleyball hamutuk $680 totál orsamentu hamutuk $1.137.
Entretantu Administradór Postu Administrativu Lautém Anacleto Fernandes Xavier agradese ba sefe suku Serelau ho nia membru konsellu suku tomak realiza eventu ba dame suku Serelau no movimentu juventude suku Serelau.
“Ha’u apresia ba juventude sira iha suku Serelau no suku viziñus ne’ebé hola parte iha jogu ida ne’e tanba bele hatudu ita bo’ot sira nia talentu ne’ebe iha hodi anima komunidade no inan-aman sira iha tempu natal no tinan foun ida ne’e,” Apa lautem hatete.
Apa Lautem kontinua enkoraza nafatin ba juventude sira atu kontinua aprende liu-liu iha área desportu nian atu nune’e iha loron boot sira iha eventu deportu nian bele anima komunidade no inan-aman sira iha area rurál.
Enkuantu jogu final ba modalidade salaun futsal ba primeiru lugar ba idade 16 mak, Block FC Primeiru Lugar no segundu lugar husi Iliara United, terceiro lugar Sika-Hoik, kuartu lugar FC Salapunu.
Modalidade futsal idade livre, primeiru lugar Kozia Jagroda, segundu lugar FC Beibetok, terceiro lugar, FC Luapala, kuartu lugar FC Korinira.
Modalidade Voleyball feto, primeiru lugar Ekipa Iliara united, segundu lugar Ekipa Centro Laikara, terceiro lugar Ekipa Ulur Odho, kuartu lugar Ekipa Salapunu.
Modalidade voleyball mane, primeiru lugar Ekipa Centro Laikara B, segundu lugar Ekipa Korinira, terceiro lugar Ekipa Centro Laikara A, kuartu lugar Ekipa Ulur Odho.
Entretantu partisipa iha eventu ba dame iha suku Serelau ne’e, APA Lautem Anacleto Fernandes Xavier ho nia estrutura, xefe Suku Daudere Agito Boavida, Veterano sira iha suku serelau, kompaña lokal sira, inan-aman no juventude sira.
Jornalista : Alberto Pires
Editor : Herminio Cardoso