Loluwari Média (Díli) – Prezidente Repúblika (PR), José Ramos-Horta, simu ofisialmente Karta Kredénsia husi Embaixadór Estraordináriu no Plenipotensiáriu foun Repúblika Korea nian iha Timor-Leste CHANG Hayeon iha Palásiu Prezidensiál Nicolau Lobato Segunda-Feira ohin.
Prezidente Repúblika José Ramos Horta simu ho laran kmanek Embaixadór CHANG no espresa konfiansa iha ninia abilidade atu hakle’an liutan lasu entre nasaun rua ne’e.
Timor-Leste valoriza tebes ninia amizade ho Repúblika Koreia, parseria ida ne’ebé konsistentemente kontribui ona ba TL nia dezenvolvimentu nasionál.
“Ha’u fiar katak iha Embaixadór CHANG Hayeon nia lideransa, ita sei buka dalan foun ba parseria, partikularmente iha área seguransa no seguransa públika, hodi aproveita ninia esperiénsia ne’ebé distintu”dehan PR Horta.
Prezidente Ramos Horta subliña importánsia husi amizade ne’ebé naruk no nota katak Embaixadór nia kontbinasaun únika husi nia esperiénsia seguransa no diplomátika hanesan rikusoin ida ne’ebé iha valór ba kolaborasaun iha futuru.
Prezidente espresa konfiansa katak Embaixadór CHANG Hayeon nia nomeasaun sei eleva no hametin kooperasaun no amizade ne’ebé eziste entre Timor-Leste no Repúblika Koreia, harii iha fundasaun respeitu mútua no vizaun komun ba pás no prosperidade iha rejiaun ne’e.
Enkuantu Embaixadór CHANG Hayeon lori distintu kareira durante dékada tolu iha servisu públiku ba nia knaar foun iha Dili ne’ebé grau akadémiku graduadu husi Universidade Polísia Nasionál Koreanu.
Nia mós iha Mestradu iha Administrasaun Públika hosi Universidade Yonsei,niia kareira ne’ebé extensivu inklui lideransa nivel aas iha seguransa públika nu’udar Komisáriu ba Ajénsia Polísia Metropolitana Seoul.
No Adjuntu Komisáriu ba Ajénsia Polísia Nasionál Koreanu.nia mós serbisu ona iha papél diplomátiku xave sira, inklui nu’udar Asistente Sekretáriu iha Gabinete Prezidente nian no tuir mai nu’udar Embaixadór ba Repúblika Guatemala.
Resipiente ida husi orden méritu servisu nian (Red Stripes) no sitasaun Prezidensiál oioin, Embaixadór Chang kombina esperiénsia kle’an iha seguransa no governasaun ho perísia diplomátika nivel aas.
Dezde estabelesimentu relasaun diplomátika iha tinan 2002, Timor-Leste no Repúblika Koreia dezenvolve ona parseria ida ne’ebé forte no amigável.
Repúblika Koreia sai nu’udar parseiru ne’ebé vitál iha TL nia dezenvolvimentu,fó apoiu signifikativu iha edukasaun, kapasitasaun, no dezenvolvimentu rekursu umanu.
Kooperasaun ne’e kontinua liu-husi kontribuisaun ba misaun manutensaun pás ONU nian, interkámbiu diplomátiku, no programa xave sira hanesan projetu dezenvolvimentu KOICA, Bolsa Estudu Globál Korea (GKS), no Sistema Lisensa Empregu (EPS), ne’ebé fornese oportunidade empregu ne’ebé iha valór ba traballadór Timor-oan sira iha Korea.
Ministru Negósiu Estranjeiru Kooperasaun (MNEK), Bendito Freitas ne’ebé akompaña embaixadór foun Korea do Sul hodi aprezenta ninia kredensiál ba Prezidente Repúblika.
“Ne’e prosesu normál ida bainhira kumprimentu ba reprezentasaun ka misaun diplomatika iha País estranjeirus, hanesan mós ita nian ba iha ne’eba no sira nian mai iha ne’e, kuandu to’o tempu mandatu remata ona sempre iha substituisaun embaixadór foun.” Dehan nia ba jornalista sira iha Palásiu Prezidensiál Bairo-Pite hafoin simu karta kredensial husi Korea du Sul, Segunda (02/03).
Tanba ne’e mak embaixadór foun mai iha ne’e atu hala’o nia knaar ka servisu tuir mandatu ne’ebé atribui ba nia, espesialmente Koreia do Sul ho Timor-Leste iha kooperasaun ne’ebé diak teb-tebes iha area oi-oin, iha ekonomia, dezenvolvimentu, infraestrutura, prinsipalmente mobilidade laborál ne’e.
“Agora ita hatene kuaze rihun hitu liu, (7000) traballadores iha Korea do Sul, ne’ebé sira nia remensas ka fila mai Timor ne’e, apoia ba ekonómia, ba Familia mudansa maka’as los.”dehan nia.
kooperasaun ho Korea do Sul ne’e importante teb-tebes iha relasaun bilaterál ne’ebé diak teb-tebes, entre lider sira desde uluk to’o agora.
“Prezensa embaixadór foun ne’e mai kontinua de’it mandatu servisu reprezentasaun diplomátika ba sira nia país atu bele marka katak kooperasaun ne’e besik malu nu’udar mós ita iha ita nia reprezentasaun Korea do Sul nian iha ne’eba, ne’e mak ohin ami mai akompaña ita nia Prezidente Repúblika simu kredensiál.”dehan nia.
Jornalista : Cesar Pires
Editór : Herminio Cardoso