Loluwari Média (Dili) – Ministeriu Administrasaun Estatal (MAE) servisu hamutuk institutu Nasional Combate HIV SIDA (INCSIDA) sensibiliza problema transmisaun virus HIV SIDA atu proteje joven sira husi moras HIV.
Diretór Nasional Apoiu Administrasaun Suku (DNAAS), Celestino Marques, informa, Ministeriu Administrasaun Estatal (MAE) servisu hamutuk ho INCSIDA halo formasaun kona-ba HIV SIDA presiza realiza iha nivel munisipiu nune’e komunidade asesu informasaun transmisaun Virus HIV SIDA.
“Ministeriu Administrasaun Estatal iha komitementu tomak fo apoiu ba INCSIDA hodi bele halo formasaun ba prevensaun HIV nian, ohin husu ona labele halo iha munisipiu Dili de’it maibé bele halo mos ba iha munisipiu hotu liliu ba iha munisipiu sira ne’ebé mak karik detekta ona nia risku bo’ot ba transmisaun HIV nune’e ita bele iha asaun ida de’it hodi halo prevensaun ba moras ida ne’e atu hadook ita nia komunidade liliu joven ho idade produtivu nune’e bele prevene sira husi transmisaun HIV SIDA iha territoriu laran tomak.” dehan Diretór DNAAS, Celestino Marques, ba jornalista sira, iha salaun CNE, kinta (13/03)
Entre tantu formasaun dahuluk realiza iha munisipiu Dili, nune’e ba munisipiu sira seluk sei hein karta husi INCSIDA ba MAE hafoin halo preparasaun ba munisipiu 13 inklui RAEOA liliu ba sira ne’ebé risku.
“Ohin formasaun ne’ebé organiza husi INCSIDA, ohin ita fokus ba Munisipiu Dili depois hotu sei iha planu tu’ir mai sei halo mos ba munisipiu sira hotu. Ohin ko’alia ona katak INCSIDA bele hato’o karta mai no hasoru exelensia Ministru depois ministeriu Estatal bele fo hatene ba munisipiu sira atu bele koopera hodi halo preparasaun atu bele realiza formasaun iha munisipiu sira.”
Prezidente INCSIDA, Daniel Marçal, hatete, formasaun HIV SIDA ne’e atu proteje no hadook an husi moras HIV SIDA, tanba ne’e hamutuk ho Media sira hodi lori informasaun ne’e ba Publiku no MAE ne’ebé na’in ba Autoridade lokal sira hamutuk ho INCSIDA atu partilla informasaun.
“Ita tenke hamutuk proteje kolega sira husi media ne’ebé hatutan ami nia liafuan sira ba ema hotu Estatal ne’ebé mak na’in ba Autoridade sira hotu INCSIDA nia programa. Ohin ne’e importante teb-tebes, tanba xefe suku, xefe aldeia, delegadu sira mak iha baze hamutuk ho komunidade sira lor-loron entaun sira tenke presiza iha kuñesimentu identifika fatin risku sira ne’ebé mak sai knuuk ba transmisaun HIV ema bele hamutuk hodi moris hamutuk iha fatin sira ne’ebé mak ita haree agora sai fatin ne’ebé ema balu targetu tanba ita haree iha Timor iha mundu transmisaun ne’e barak liuhusi relasaun sexual.” nia hatete.
Persentajen husi transmisaun HIV SIDA fim de tinan 2024 hamutuk 2.200 resin ne’ebé hetan moras HIV SIDA husi idade joven produtivu sira.
“Ministeriu Saúde ne’e fim de 2024 ne’e iha ona rihun rua atus rua resin 2.200 ona, barak liu ne’e ita haree husi idade mak produtivu tebes, se ita la servisu makaas la hamutuk mak ita sei lakon fini barak.”
Jornalista : Anis