Loluwari Média (Díli) – Xefe Investigasaun Munisípiu Díli, Inspetór Xefe Polísia, Rogerio dos Reis, informa, Komandu Munisípiu Díli durante Janeiru to’o Marsu 2025 rejista kazu hamutuk 387.
“Husi kazu ne’ebé ita rejista hamutuk 387, no kazu ne’ebé aas liu mak Ofensa integridade fizika tu’ir mak kazu Violensia domestika no husi kazu sira ne’e ami lori ona ba Ministeriu Publiku (MP). Tanba sira mak na’in ba prosesu penal atu sira bele prosesa kazu ne’e ba oin.” Dehan Xefe Investigasaun Munisípiu Díli, Inspetór Xefe Polísia, Rogerio dos Reis, ba jornalista sira, iha Komandu munisípiu Díli, segunda (17/03).
Inspetór Reis, hatete, Komandu munisípiu Díli servisu hamutuk ho Forsa Defeza Timor-Leste (F-FDTL) rejista mos kazu joven na’ok ema nia sasan hadau ema nia telemovel no naok ema nia motor iha fatin-fatin liliu iha kapital Dili.
No komandu munisipiu Dili konsege detekta autor balu hodi ba kumpri iha sela polisia durante oras 72.
“Kazu Violensia doméstika ne’e kauza husi problema husi uma laran nesesidade uma laran dala ruma mos dezentendimentu husi fen ho laen inklui mos kaben sedu halo problema violensia domestika mosu.” Reis argument.
“Prevensaun ne’ebé ami halo mak, sosializasaun ba eskola sira no mos ami halo sosializasaun ba komunidade iha suku no aldeia sira hamutuk ho ita nia Ofisiál Polísiamentu Komunitáriu sira.”
Kada tinan Komandu munisípiu Díli rejista kazu aas liu mak iha Postu Administrativu Dom Aleixo, nian tanba komunidade barak mak hela iha ne’eba no sai mos hanesan sentru ba Negósiu tanba ne’e mak kada tinan kazu sempre aas iha ne’eba.”
“Hahu husi janeiru to’o mai ohin loron parte husi Investigasaun Kriminal Munisípiu Díli simu delegasaun kompeténsia husi Ministériu Publiku 86 delegasaun ne’ebé parte investigasaun simu atu bele kontinua ezekuta tu’ir Mandadu no orden MP.
“Husi janeiru ita simu 26 delegasaun no fevereiru ita simu 19 no iha Marsu ita simu delegasaun 41 ne’ebé total hamutuk 86 delegasaun kompeténsia ne’ebé mak entrega mai iha Polísia Investigasaun Kriminál Munisípiu Díli atu bele ezekuta.”
Kazu ne’ebé Investigasaun Kriminal Munisípiu Díli simu husi MP mak kazu Violensia doméstika, kazu Asaltu, kazu Furtu agravadu no mos kazu sira seluk ne’ebé akontese iha area munisípiu Dili.
Jornalista : Chay Risky