Loluwari Média (Dili) – Komandante Polísia Nasionál Timor-Leste (PNTL), Komisariu Jerál, Henrique da Costa, afirma, promosaun tranzitoriu ba membru PNTL hamutuk 2.763 hodi servi povu no estadu.
“Ohin ita hala’o promosaun tranzitoriu ba membru sira hotu kuaze 68% benefisia ba promosaun refere, parabens ba imi hotu, diviza no farda ne’ebé ita uza ne’e povu nian, responsabiliza ba diviza ne’ebé imi simu tanba depois promosaun ida ne’e komandu sei jere hodi koloka imi ba asume kargu iha ne’ebé de’it iha Timor-Leste, balu uluk sai nu’udar kondutor de’it dala ruma nia sa’e ba liu fali nia komandante, ita tenke simu mós realidade ida ne’e, ida ne’e mak ita bolu mudansa, hatudu nafatin imi nia disiplina, respeita malu, kamaradajem, unidade, lealidade ba superior sira” dehan Komisariu Jerál, Henrique da Costa, iha nia diskursu palasiu governu, Kinta (27/03).
Promosaun ba membru tranzitoriu kuaze pursentu 68 hodi benefisia ba promosaun ne’e no diviza ho farda ne’ebé uza povu nian no simu diviza hodi responsabiliza hodi servi ba povu no rai doben ida ne’e.
Iha instituisaun PNTL halo asaun disiplina lealidade, rona de’it hirarkia komandu no sai independente ba instituisaun hodi labele mete polítika no labele mete ba grupu arte marsiais sira.
“Ita tenke unidu iha instituisaun nia laran, disiplina, lealidade, hodi rona de’it ba hirarkia komandu, labele mete ba polítika sira nia servisu, labele mete tan grupu arte marsiais no arte ritual sira. Tanba ita halo juramentu bebeik ona maibé komunidade sei nafatin ko’alia kona-ba ita nia neutralidade ba atendimentu sira iha terrenu.”
“Hahu husi ha’u hanesan komandante jerál no segundu komandante jerál, ofisiál, sarjentus, ajentes ita hotu, polísia iha tanba povu, servi estadu no ita nia povu ho loloos, respeita ita nia povu sira ne’e mesak ita nia inan-aman, feton, naan, maun, alin oan halakon arogansia, foti an la respeita ema, bobar lia, atuasaun la tu’ir prosedimentu, hahalok hirak ne’e hatudu momos la profisional nian, hahalok hirak ne’e mak kontribui hodi hatun kredibilidade estadu no imajen instituisaun hodi hamihis konfiansa povu no estadu nian mai PNTL.”
Alende aniversariu PNTL tinan ne’e ho nia lema hamutuk Hametin Konfiansa, ho nia sentidu husi lema ne’e hatudu katak PNTL presiza servisu hamutuk ho entidades hotu ba komunidade, joven no líder komunitariu sira.
“Aniversariu tinan ne’e mai ho nia lema “Hamutuk Hametin Konfiansa” ninia sentidu PNTL presiza servisu hamutuk ho entidades hotu komunidade, joven, feto no mane, veteranus, líder relijiosos, eskola, líder komunitariu sira atu nune’e ita bele fornese atendimentu ne’ebé di’ak no lais hodi hetan konfiansa husi povu.” nia informa.
Primeiru Ministru (PM), Kay Rala Xanana Gusmão, iha nia diskursu hatete, aniversariu PNTL ba tinan 25 sente orgullu no onra bo’ot ba PNTL sai nu’udar instituisaun fundamental no seguransa ho instabilidade iha Timor-Leste.
“Orgullu no onra bo’ot tebtebes mai ha’u bele selebra hamutuk ho ita bo’ot sira 25 aniversáriu PNTL, instituisaun fundamentál iha seguransa ho estabilidade país, membrus PNTL, ba imi hotu, ha’u hato’o parabéns ne’e hanesan opurtunidade únika ida hodi rekuñese no agradese imi hotu nia profissionalizmu ho imi nia dedikasaun ba povu Timor.”
Entre tantu iha 27 Marsu 2025 hodi selebra de’it instituisaun PNTL, nune’e mós sai momentu historiku ida hodi halo tranformasaun institusional no PNTL hahú moris ona bainhira halo konstrusaun estadu ida ne’e no molok restaurasaun ofisiál ba Timor-Leste nian independensia ne’e
“Ohin, 27 Marsu 2025, ita la selebra de’it imi nia instituisaun nia aniversáriu, maibé mós hanesan momentu istóriku ida kona-ba transformasaun institusionál, PNTL hanesan ita bo’ot sira hatene, moris kedas ona bainhira hahú konstrusaun estadu ida ne’e mezmu molok restaurasaun ofisiál independénsia. No, hahú husi ne’ebá, instituisaun ida ne’e hasoru obstákulus, krizes no dezafius bo’ot, husi loron ba loron, tinan ba tinan”. nia haktu’ir.
PNTL sai hanesan ho instituisaun sira seluk ne’ebé nasaun ne’e nian, no mosu mai husi ahu-kudesan laran, hodi ohin loron sai hanesan pilar (ka, ai-rín) bo’ot ba Repúblika Demokrátika de Timor-Leste (RDTL) nian ne’ebé hodi servi ba povu no rai doben ida ne’e.
Opurtunidade ida ne’e hodi selebra ezistensia PNTL legadu husi superasaun ho maturidade ba prestasaun servisu husi PNTL ba Timor oan tomak.
“Tanba ne’e ohin, hanesan opurtunidade di’ak ida atu ita selebra. La selebra de’it tinan ida tan husi ezisténsia PNTL, maibé mós legadu tomak ida kona-ba superasaun ho maturidade iha prestasaun servisu husi membrus PNTL sira ba timoroan tomak”.
Iha aniversariu PNTL ne’ebé prosesu no atinji ona ho pontu maximu hodi reflete esforsu nasionál ne’ebé foin primeira vez 2.763 polísia hodi hetan promosaun ba transforma estrutura PNTL.
“Prosessu ne’ebé ohin atinje nia pontu máximu, reflete esforsu nasionál ne’ebé foin primeira vez akontese, mais de 2.763 polísias mak hetan promosaun, hodi nune’e transforma, kle’an tebes, estrutura PNTL. Transformasaun husi jerasaun ba jerasaun ne’e sei promove forsa seguransa ida ne’ebé ho kapasidade profissionál, ne’ebé orienta ho valores fundamentais hanesan irarkia, disiplina no integridade”.
Jornalista : Anis